Diasabra anochi 11:00 pm polis a duna un auto señal pa para den Playa pero sin resultado. Ta birando un “trend” e ultimo dianan aki, cu sea automobilista of motociclista, ta opta pa aumenta velocidad ora polis duna nan señal pa para. Ta trata aki di un auto marca Nissan modelo March color cora kima, numera A-72822.
A draai basta rato den Playa pa djey termina den Arendstraat. Durante e persecucion, e auto por poco a dal den e patruya di polis. Na Arendstraat 110, e chauffeur a core baha bay paden di e cas y sconde. Como cuater unidad di polis a presenta pa duna refuerso na nan coleganan.
E scondemento pa polis no a dura largo, mirando cu un subfiscal a presenta un rato despues y duna autorisacion pa drenta e cas y detene e chauffeur. E homber a resisti su detencion formal, cu ta motibo suficiente pa polis atende cu ne den un forma mas duro.
Polisnan a lastra e sospechoso sac’e for di su cas. Un rato despues a carg’e y hinc’e den e transporte policial pa hib’e ward’i polis caminda un subfiscal lo dicidi sea riba su encarcelacion of libertad.
Tin cu enfatisa si, cu e homber tabata bou influencia di un of otro substancia. Esey ta cuadra tambe cu su comportacion. Polis den un forma tactico a logra domina e homber y na final takel e auto y hib’e ward’i polis. Na su yegada na ward’i polis di Playa e sospechoso mes a baha y cana drenta paden den tur trankilidad.
