Desde diasabra ultimo, esta dia 17 di april 2021, e conocido Hubert Maduro a yega clinica Fundacion Cardiovascular de Colombia na Bucaramanga. Esaki relaciona cu un operacion cu e mester a haci di masha tempo caba na su curason, pero pa motibonan for di su alcance, mester a warda pa hacie awo. E operacion a bay bon y awe e por a sali for di e clinica, pero mester keda Colombia por lo menos un siman mas pa recuperacion y pa control.
Tabata na december 2020 cu Hubert Maduro, e actual vice-presidente di Conseho Electoral, a realisa dos caterisacion cardiaco, di cual un di nan tabata pa un diagnostico. E resultado? E asina yama “aortaklep” na su curason no ta funciona mas. Como tal a intern’e y diadomingo ultimo pa reemplasa su “aortaklep” y pa dialuna mes haci un caterisacion atrobe.
E operacion a bay bon, aunke cu e vice-presidente di Conseho Electoral a admiti cu el a topa cu poco complicacion inespera den e proceso di recuperacion. Pero asina mes, e “aortaklep” nobo na su curason ta funcionando y dunando bon resultado. A wanta e pashent un siman mas den hotel na Bucaramanga, pa e specialistanan por ta sigur cu e curason ta sigui funciona manera mester ta y sin ningun otro tipo di complicacion. Si tur cos bay bon, diasabra venidero e lo bula pa Bogota anochi pa sali diadomingo mainta pa Aruba atrobe.
Entretanto e personal atento di Censo y Registro Civil hunto cu DOW ta sigui cu tur e preparacionnan necesario pa organisa eleccion parlamentario na Aruba dia 25 di juni proximo. Tambe, e siman cu ta bin dr. Glenn Thode, cu ta bibando na Hulanda pero keto bay ta ocupa e puesto di presidente di Conseho Electoral, lo yega nos isla pa por sigui cu e trabounan di preparacion pa eleccion. Por lo menos un di e retonan ta e cambio cu kier realisa den votamento semi electronico, den cual lo scan voto di tur votado ora nan caba di vota. Ta obvio cu no ta tur partido politico, sigur esun mas grandi den e ultimo eleccion (AVP), a expresa critica pisa contra e cambio aki.
Hubert Cyril Maduro di 77 aña di edad ta un hurista renombra riba nos isla. El a traha hopi aña na Corte di husticia di nos pais y hasta tabata representante di pais Aruba den Raad van State di Reino Hulandes entre aña 2006 y 2014. Awendia e ta e vice-presidente di Conseho Electoral di nos pais. E ta den e conseho aki desde aña 2005 caba. El a studia entre aña 1964 y 1967 pa “landmeetkunde” na Hogere Technische School (HTS) na Utrecht. El a sigui studia entre 1976 pa 1982 na Tilburg, pero e biaha ey a studia ley. Na aña 2009 a hacie miembro di Commissie Democratisch Deficit den nomber di Parlamento di Aruba.
