Anyone den estilo di bachata ta e cancion presenta pa e cantante local Magy. Un produccion mas di nos talentonan local.
Magy a scoge e cantica aki cu e famoso cantante Mericano Justin Bieber a lansa originalmente den un version balada.
Magy a gusta letranan di e cantica y a dicidi cu e kier hacie cover pero den un version bachata cu ta un genero cu Magy gusta masha hopi mes.
Magy a acerca Denny Loefstoep kende ya caba ta un productor basta conoci na Aruba. El a yega di traha cu diferente genero caba manera ritmo combina, tumba, merengue y hopi mas.
Despues cu e areglo aki a keda cla Magy a drenta studio di Nigel Maduro miho conoci ” Nigel Dream” pa asina graba full e produccion: melodia,ritmo y bos. Mixing y Mastering tambe a keda den man di Nigel Dream.
Den parti percussion, bongo cu raspa tabata tin e talentoso Julius Martines y riba conga pa duna e bachata un otro “flavour” tabatin un hende muher Jennifer vd Biezen kende tambe a haci un tremendo trabou.
E team ta manda palabra di gradicimento na John kelly kende a haci full e produccion di video clip y un super danki tambe na Diamonds Sound & Lighting Solution pa tremendo setup di luz y video scene.
E meta ta pa e cantica aki di Magy yega na escenarionan internacional y cu un super calidad. Pa nan sa cu Aruba tin hopi talento mes!!
Lo por spera hopi mas produccion di Magy den 2021, no solamente cover pero tambe canticanan original. Por pasa like Magy su page di facebook @magymarinmusica
