Despues di e tremendo instalacion siman pasa den Cas di Cultura, e weekend aki, tur e participantenan pa Little Princes, Little Miss, Preteen di Cas Princesa Aruba a tene un dia cu actividad social.
E tema di e dia tabata “Ban conoce otro (turista riba mi isla)”. Durante e paseo varios parti nan turistico riba e ruta di bus Oranjestad pa San Nicolas a ser bishita.
Na final mayornan a busca nan yiu y tur a bay cas contento.
Cas Princesa ta corda tur hende cu dia 26 di mei tin e competencia di talento den Cas di Cultura. Bishita e pagina riba facebook di Cas Princesa Aruba, pa mas informacion.
Instalacion Cas Princesa 2018
Mientras tanto siman pasa den Cas di Cultura dilanti di un publico grandi a tuma lugar instalacion di e candidatanan di Cas Princesa 2018, manera cu a menciona anteriormente.
Un total di 11 candidata di Miss Beauty a ser oficialmente instala pa e diferente certamenan cu ta Little Princes, Little Miss y Preteen pa Cas Princesa Aruba. E aña aki a introduci un categoria nobo cu ta esun di Miss Teen Petite 2018. Esun aki lo ser corona den e certamen final dia 29 di juni 2018 den Cas di Cultura.
E maestro di ceremonia di e anochi tabata Addonsito Croes y a conta cu presentacion di Diamond Dance Group kids & teens, Judson Vrolijk, Gucci Dancers, Candy Dancers y teen. E sorpresa di e anochi cu a pone e publico grita tabata e momento cu nos artista internacional JEON a parece riba e escenario mientras Diamond Dance tabata presenta e exito mundial “Machica”.
