Benu Pharmacy un biaha mas a organisa un charla pa su clientenan y Aruba en general den cuadro di nan programa Benu Health Series. Ta trata di charlanan cu tema di medicina cu ta interesante pa e pueblo, ya cu e ta regarda nan salud.
E tema di e siman aki tabata “Cancer na Pecho”. E biaha’ki e a organisa e charla hunto cu Mary Joan Foundation, cu ta atende cu e tema di cancer, y fundacion BOB. Esaki den cuadro di luna di october cu ta e luna di conscientisacion riba cancer.
E luna aki ta e luna di conscientisacion di cancer na pecho y ta probecha pa distribuicion informacion valioso di e tema aki. E luna aki hopi compania y scolnan ta pidi pa informacion. E informacion cu ta suministra e luna ta concentra hopi riba e aspecto preventivo y tur e sintomanan cu lo sinti. Ta hopi importante pa haci e control propio un biaha pa luna, ta informacion cu a bini dilanti. Y si sinti algo, bay dokter di cas mesora. Tambe a informa e publico cu ta importante pa controla tur luna y aunke cu ta papia di cancer di pecho, e ta algo cu por afecta hende homber tambe pa cual ta importante nan tambe haci nan controlnan.
Tambe a hiba palabra e anochi aki Diantha Nuesch di PR & Marketing di Fundacion Borstkanker Onderzoek BOB Aruba, kende a splica cu cada un di e organisadonan tabatin un rol den e charla aki cu a wordo duna na Cas di Mito na MFA Paradera. E representante di Mary Joan Foundation a bay riba self examination. Nan di BOB a splica riba con nan ta haci nan programa di Mamografia. Nan ta registra nan pashentnan den un sistema pa recorda e hendenan pa controla cada dos aña.
Ainda tin tabu pa loke ta e test di mamografia. Tin hende ta duda si realmente nan mester haci e test y otronan no ta bay pa motibo di berguensa. P’esey Fundacion BOB ta keda existi e necesidad pa sigui duna informacion y conscientisa e pueblo di e importancia pa sigui haci mamografia y test / control di pecho. Sra. Nuesch a splica cu e grupo di enfoke di nan ta entre 45 y 75 aña di edad, cu ta e grupo bou di cual mas tanto problema di pecho. Ta manda carta di invitacion pa e personanan aki. Normalmente rond di 4 mil hende muhe ta haya invitacion anualmente pa presenta y haci e test di pecho.
Vice Presidente di e organisacion Mary Joan Foundation, Jose Tromp, a expresa cu nan organisacion sigur ta agradecido na Benu Pharmacy y Fundacion BOB pa e colaboracion aki y nan ta hopi satisfecho cu e reaccion di pueblo, unda cu rond di 75 persona a participa activamente. E charlanan di Benu Health Series ta sigui y keda pendiente pa e siguiente.