Anualmente dr. Horacio E. Oduber Hospital ta analisa e cantidad di pashent cu a acudi na Departamento di Emergencia e dianan prome, durante y despues di cambio di aña. E analisis a cuminsa dia 30 di december 2022 pa 6pm y a termina dia 2 di januari 2023 pa 6am.
Un cantidad di 361 persona a acudi pa sea ricibi atencion medico na Departamento di Emergencia of dokter na warda. Aña pasa ainda Aruba tabata den e gara di Covid y e cantidad di pashent tabata poco menos, esta 326 y na aña 2020 hasta 262. E aña aki a atende tres victima di klapchi. Aña pasa tabata ningun caso, cu ta algo remarcabel. Na aña 2020 y 2021 tabatin 2 caso di klapchi.
Di e 361 personanan cu a yega hospital pa ricibi cuido medico, un total di 152 a ricibi atencion medico na Departamento di Emergencia. Mayoria pashent (54%) tabata hende homber. E edad di mas abou cu tabatin mester di atencion na Departamento di Emergencia ta un baby di 3 luna y e pashent di mas grandi tabatin 94 aña di edad. E edad averahe di e grupo cu a acudi tabata 48,7 aña. Edad cu mas a acudi Departamento di Emergencia ta entre 19 cu 65 aña.
Ta interesante tambe pa analisa e motibo di bishita durante e fin di siman di fin di aña. Di e 152 pashentnan cu a acudi na Departamento di Emergencia, un total di 68 tabatin herida/lesion: 12 tabata involucra den un accidente di trafico, 7 persona den incidente di violencia, 3 pa motibo di vuurwerk y 46 pa motibo di por ehempel caida, verzwik enkel, corta curpa, etc. E otro 84 casonan tabata pa otro motibo cu no tin di haber cu traumanan fisico, manera por ehempel intoxicacion, dolor na pecho, dolor di stoma, sacamento, un of otro infeccion, reaccion alergico, etc.
Di e 152 pashentnan cu a acudi na Departamento di Emergencia, a admiti un total di 45 pashent den hospital. Atrobe mayoria pashent admiti (60%) tabata masculino. Edad averahe tabata 51,6 aña.
Hospital ta desea henter comunidad un feliz aña 2023, yena cu amor, prosperidad y salud! Y si encaso bo mester di asistencia medico, corda cu nos di HOH semper t’ey!
