Aruba a habri diaranson cu un video circulando riba rednan social cu a hala hopi atencion. E situacion serio a pone cu Departamento di Salud Publico (DVG pa su abreviacion na Hulandes), a dicidi cuminsa un investigacion. Esaki pasobra cu normalmente na momento di habri caha di morto pa saca defunto, DVG mester ta presente pa controla y garantisa cu e funeraria ta tene su mes na reglanan y protocolnan mara na e procedura aki.
Den un declaracion di DVG, nan a bisa: Relaciona cu e video circulando riba Facebook, caminda por observa un funeral home renombra ta deshaci di un caha di morto den un “trash bin”, tin atencion di DVG. Minister encarga cu Salud Publico (Dangui Oduber) y tambe servicio di Warenkeuring en Hygiene di Departamento di Salud Publico a tuma nota di e imagen aki y lo cuminsa cu un investigacion inmediato.
No por keda sin menciona cu tin masha hopi comentario riba red social relaciona cu e practica aki. Sea cual sea e motibo, mester tin un otro forma pa deshaci di un caha di morto cu tabata den kelder of bou tera den santana pa tanto aña. Aunke kisas a saca e restonan mortal for di e caha, asina mes ta keda restonan cu no por djis subi dump mescla cu otro desperdicionan of bay den planta di reciclahe. Probablemente lo mester deshaci di tipo di desperdicionan asina, den cual tin restonan humano, hunto cu desperdicio medico. Separa di peliger di salud, e no ta representa e respet ni dignidad cu mester brinda na un difunto.
Reaccion di DVG:
Despues cu riba e red social di facebook a keda publica un video, caminda e imagennan ta ilustra un funeraria deshaciendo di un caha di morto cu aparentemente restonan mortal aden. DVG por informa cu tur proseso den e caso aki a sosode segun reglanan di higiena stipula. No tawata encontra ningun resto humano den e caha y e proseso a tuma lugar bou guia di controleurs. Esaki ta un proseso cu ta tuma luga frecuentemente ora cu e funeraria ta saca un caha di morto bieu. Ora un caha wordo saka e ta wordo transporta directamente pa dump of eta wordo benta den container di dicho funeraria. Despues e compania di e container ta percura pa recohe y deshaci di e caha na dump.
