Den e ultimo carta di College Aruba financieel toezicht (CAft) un biaha mas ta hala atencion di Minister di Finanza Xiomara Maduro. Y e motibo ta mesun cos atrobe. No ta entrega reportahe na tempo, cu ta stroba CAft pa mira si ta cumpli cu ehecucion di presupuesto. Pero tambe ta stroba e organo parlamento di haci nan trabou di controla gobierno.
Den e carta fecha 14 di maart, ta bisa cu ta reacciona riba uitvoeringsrapportage (UR) di Aruba riba e di tres kwartaal di 2023. A ricibi esaki dia 29 di februari ultimo.
Den e carta ta señala na e mandatario cu e no a cumpli cu loke ta palabra den Landsverordening Aruba financieel toezicht (LAft), cu ta menciona cu e UR aki mester ta entrega no mas laat cu 13 di november 2023.
CAft si a cumpli pa manda nan reaccion den dos siman di tempo.
Importante den e carta ta cu ta menciona cu CAft ta kere cu Aruba lo cera aña 2023 cu un “financieringsoverschot” (nan entrada ta mas cu e gastonan) di 200 miyon florin. Esaki ta tres porciento di e Producto Bruto Nacional (PBN), cual ta e entrada produci door di e ciudadanonan.
Manera cu tabata e conseho den e otro cartanan di evaluacion, CAft ta conseha Aruba pa hinca tur esaki den pago di debe. Esaki ta hopi necesario pa baha e presion riba e suma di interes, cu na su turno e ora lo crea espacio pa haci otro gastonan necesario.
Y CAft ta bisa Aruba pa hinca e resultado den e prome adaptacion di presupuesto di 2024.
SPLICACION
E surplus financiero di presupuesto di aña 2023 a bini debi na entradanan adicional cu no a spera. Ta papia di entrada for di belastingnan directo (winst- y loonbelasting), belastingnan indirecto (belasting op bedrijfsomzetten (BBO), accijnzen y tarifa di importacion, y otronan (toeristenheffing y deviezenprovisie).
E bonanza aki no ta solamente gobierno a sinti esaki, pero tambe a tuma nota di esaki cerca entidadnan di gobierno. Na Aruba Tourism Authority (ATA) e entradanan di aña 2023 tabata 20 miyon mas halto cu loke a presupuesta.
Un problema cu a señala anteriormente tabata e gastonan di personal. Den e conseho cu CAft a duna den e presupuesto adapta di 2023 a bisa cu no ta cumpliendo cu e norma pa gasto di personal, pa cual a pidi pa tuma e medidanan necesario.
Pero CAft a tuma nota den e di tres UR cu e gastonan di personal tabata menos di loke a presupuesta pa e periodo ey. Ya bisa cu si e tendencia ey sigui asina, e ora den e di cuater kwartaal di 2023 lo por logra toch mantene nan mes na e norma poni pa 2023. E problema tabata e suma pone pa overtime.
Den e carta por a tuma nota tambe cu gobierno tin su mannan duro mara pa cu inversionnan. Pues nan mes ta inverti masha poco, apenas 3 miyon florin.
E debe nominal di Aruba a baha, despues di un reduccion di 131 miyon den e di dos kwartaal, den e di tres kwartaal el a baha cu 11 miyon mas. ZE debe awo ta na 5.610 miyon florin, cu ta 82% di e BBP. .
Na final CAft a ranca orea di Minister Maduro. Nan ta bisa cu ta keda enfatisa di e entrega na tempo di e Uitvoeringsrapportagenan. Apesar di diferente peticion di CAft pa cumpli cu e terminonan palabra den LAft, e di tres reportahe di aña2023 tambe a tarda. “Door cu ta entrega e reportahenan aki laat, tanto CAft como Parlamento ta wordo limita den e posibilidad pa durante aña haci evaluacion si e presupuesto ainda ta reali8stico of si e mester di adaptacion. Di e forma aki ta stroba parlamento den su budgetrecht,” ta skirbi den e carta pa Minister di Finanza.
