Den cuadro di descontinuacion di transaccionnan por medio di check sea personal of comercial, Aruban Bankers’ Association (ABA) ta anuncia e fase final pa Aruba su transicion na un sistema bancario mas digital. Entrante 1 di mei 2018, banconan lo no ta emitiendo ni procesando checknan pa cliente particular y entrante 1 di november 2018 esaki tambe lo conta pa clientenan comercial. Clientenan particular y comercial por entrega nan buki di check for di awor caba pa ricibi su balor bek.
ABA a duna inicio algun luna pasa na e campaña di informacion relaciona cu e trayecto pa descontinuacion di uzo di check. E Asociacion di Banconan di Aruba ta enfatisa cu tur banco local tin alternativo pa locual ta e descontinuacion di check, pues comunidad di Aruba por ta trankil riba e parti aki manera cu e descontinuacion ta oficial.
Un di e aspectonan cu ta importante pa publico ta na altura di dje ta e beneficionan cu e descontinuacion di uzo di check tin pa esnan cu ta ricibi esaki como pago a cambio di trabou, producto y/of servicio.
Manera a trece dilanti algun siman atras, teniendo cuenta cu su clientela, ABA a elabora un plan cu ta bay ehecuta den diferente fase. Di e manera aki ta brinda tur esnan cu mester, e tempo suficiente pa busca y adapta na otro alternativanan di pago.
Sistema bancario mas digital
Ta existi un consenso entre banconan internacional basa riba e ponencia cu e procesamento di checknan tin un impacto negativo, tanto riba e servicio, como tambe den riesgonan innecesario na cual ta expone e cliente y entidad bancario. Tur banco miembro di e Asociacion di Banconan di Aruba a realisa e inversionnan clave pa ta debidamente prepara pa e cambio aki. E buki di check ta un manera hopi anticua pa paga un tercer partido. Cu un tercer partido ta referi na un empleado, compania of persona na kende bo persona mester haci un pago y ta haci e via di banco. Sinembargo, awendia tecnologia a desaroya y banconan comercial ta invertiendo hopi den esaki pa ofrece servicionan electronico y digital pa medio di online banking y mobile apps. Kiermen cu tur loke bo tabata haci cu buki di check awor ta bira mas facil, mas lihe y mas sigur pa tur hende.
Servicio mas rapido y eficiente
Ora bo haci bo transferencia via bo online banking y te hasta na bo banco mes, esaki ta dura un dia pa e persona ricibi su placa. Y si e persona ta na e mesun banco cu bo, e ta haya su placa na mesun dia di transaccion. Di e forma aki fondonan ta pasa di un cuenta pa otro mas eficientemente, generando un efecto positivo pa e economia di Aruba. Esaki ta asina pasobra simplemente tur hende ta den capacidad pa realisa mas cobransa y pagonan den e mesun cantidad di tempo.
Pa e miles y miles di empleado cu ainda ta ricibi salario pa medio di check, e noticia di nan descontinuacion ta uno hopi alentador. Normalmente un trahado mester pidi liber pa bay banco, para den fila y ricibi nan salario. Mientras cu si bo haci e transaccion automaticamente, e persona tin su cuenta di salario na banco y den dos minuut e tin su salario riba su cuenta.
Despues e por haci uzo di dje por medio di lanta placa na ATM y/of e ta paga cu su carchi. Por medio di e descontinuacion di uzo di check, ABA ta habri caminda pa e tercer partido entrega su servicio y/of producto por ricibi su pago practicamente de inmediato. No lo mester deposita e check y despues warda un periodo pa wak si un check ta clear of no. Pues e servicio nobo aki no solamente ta mas eficiente, e tambe ta elimina e posibilidad di comete fraude cu check.
Banconan local envolvi
Banconan local a pone cabes hunto pa crea un plan den cual por alcansa e meta comun, sin afecta e shen di miles di cliente. Asina a realisa inversionnan no solamente den e infrastructura tecnologico di cada instancia bancario, pero tambe un acuerdo pa fiha pasonan cu lo tuma hunto, banda di un campaña informativo pa guia e comunidad den e proceso.
Aruba Checkout ta un campaña den colaboracion cu Aruba Bank N.V (527 7700), Banco di Caribe (523 2250), Caribbean Mercantile Bank (522 3000), First Caribbean International Bank/CIBC (522 5600) y RBC Royal Bank Aruba NV (588 0101). Pa mas informacion por libremente tuma contacto cu bo banco preferi, of bishita www.arubacheckout.com pa cualkier pregunta cu bo por tin of informacion.
