Abogado Desiree Croes, representante legal di Mike de Meza y su casa, dr. Brigitte de Meza-Every, a duna splicacion tocante e keho penal cu director di Departamento di Impuesto (DIMP) a entrega contra e pareha. Segun Croes, desde principio di 2025 su clientenan a entrega documento, carta y e-mail pa aclaria e acusacionnan relaciona cu transaccionnan fiscal. E abogado ta sostene cu e informacion tabata suficiente pa conclui cu no tabatin actividad ilegal.
Durante e entrevista, Croes a menciona cifra entre 1,1 y 1,7 miyon florin cu, segun e, no tabata refleha e realidad. El a indica cu e pruebanan entrega tabata inclui documentacion di compra y benta, cu algun transaccion sin ganashi. Croes ta cuestiona dicon director di DIMP a dicidi di sigui cu e keho penal, a pesar di e aclaracionnan. Segun e abogado, e keho tampoco ta inclui tur e informacion cu e departamento a ricibi, loke por afecta e evaluacion di autoridad.
P’e motibo ey, e ekipo legal ta preparando un keho contra e director, relaciona cu supuesto difamacion y falsedad den documento. Nan ta pidi un investigacion pa determina dicon e informacion presenta no a considera completamente. Croes a enfatisa cu e procedemento a afecta reputacion di su clientenan y cu nan kier claridad tocante e decisionnan tuma. E declaracionnan ta representa posicion di e ekipo legal. Ainda no tin determinacion hudicial cu ta confirma e acusacionnan contra director di DIMP.
Pa mas detaye lesa TREMPAN
