Den un comunicado di prensa, ex-minister, ex-parlamentario y miembro di partido UPP, Candelario ‘Booshi’ Wever a comenta cu el a sigui e conferencia di prensa di minister Ursell Arends cu hopi atencion y manera el a bisa caba, tipo di actuacionnan infantil asina ta pone su heringa cu e no por keda sin reacciona.
E ta sigui bisa: “Un minister di ademas di no sa unda su cara ta para, ta parce di conscientemente ta tapa e berdad encuanto e maneho desastroso cu ex-minister Otmar Oduber a ehecuta na Serlimar. E pregunta ta surgi kico lo por ta e motibo di e comportacion infantil di e minister?
Na prome luga mester constata cu e minister encarga e.o. cu integridad atrobe ta laga hopi di desea, pero mas importante ta cu probablemente transparencia lo perhudica e gobierno anterior di POREDmep cu a conspira hunto cu Otmar Oduber pa sangra Serlimar. Pues atrobe e transparencia ta completamente “zoek”.
Riba un pregunta di un miembro di prensa cu si e incinerador (“miskoop”) ta den operacion, e minister a SCOGE pa GAÑA!
Minister a bisa cu esaki NO ta den operacion pa BASTA DIA caba pa motibo cu mester cambia e filternan y esaki ta tardando pasobra nan no ta na Aruba ainda! Riba e potretnan cu mi a inclui por mira hopi cla cu diahuebs 21 di juli a Incinerador tabata den operacion! (E bandera ta indica cu e incinerador ta den operacion) y por cierto n’e momento cu e minister tabata papia den e conferencia di prensa e incinerador tabata operando (mira e huma den e di 2 potret)!
Dicon e minister ta gaña?? Si ta operando e incinerador toch cu filter cu ta sushi, esaki keda malo pa salud di hende, dicon ta pone e incinerador traha toch? Esaki te hasta por yama esaki un acto criminal!! Esaki ta INTEGRO? No toch?
Aparte di esaki con bin e minister actual ta defende e deal corupto aki cu alma y curpa y te hasta ta yama esaki uno “state of the art”. Dicon anto NO tin e filternan aki na Aruba mes? E pregunta ta cu si esey tambe pueblo lo mester paga p’e, ya cu pueblo ta paga p’e diesel cu e incinerador ta uza. Esaki t’e prome prueba di e manipulacion den e conferencia di prensa di e minister aki.
Riba un otro pregunta cu dicon e incinerador (“miskoop”) ta sigui opera siendo esaki ta bay en contra di e Ley di Ordenanza di Desaroyo Teritorial (LRO) y ROPV. E minister ta contesta “doodleuk” cu e edificio ey t’ey for di 2007 caba. Pues insinuando cu ami tambe lo a actua contra pasobra e tempo ey mi persona tabata minister. Pa informacion di minister Ursell, e tempo ey ROPV NO tabata existi ainda! Wel bay busca otro muraya pa frega bo curpa y purba di tapa e hecho cu simplemente bo ta actuando deliberadamente contra e Ley di Ordenanza di Desaroyo Teritorial (LRO) y ROPV (2021).
En bes di a coregi e eror di ex-minister O. Oduber el a SCOGE pa pone man riba su cabes y pa colmo sigui cu e ola di corupcion cu ta rondona henter e asunto di e compra di e incinerador chikito. Den e ROPV actual (articulo 25.2 sub c), desde 2021, ta poni hopi pero hopi cla cu ta prohibi pa presta e edificio pa uzo di procesamento di desperdicio y specificamente na unda e incinerador ta situa (aanduiding Parkietenbos). Y hasta p’e uzonan ya existente, prome cu 2021, articulo 30.12 di e ROPV ta stipula claramente cu desde 2021 e uzo di e instalacionnan manera e incinerador no mag opera fo’i Parkietenbos mas.
No por conclui otro cu Minister Ursell di Integridad di gabinete MEPraiz, ta aplaudi y promove violacion di Ley di Ordenanza di Desaroyo Teritorial (LRO) y ROPV (2021). Algo porcierto nada integro! Pero e minister mester sinta aki riba su propio blaarnan, cerbes di purba schuif su actonan iresponsabel, ilegal y no integro riba mi persona. E asunto ta bira pio, si tene na consideracion e echo cu Minister Evelyn Wever- Croes, como minister di Infrastructura y Ordenanza, no lubida cu nos Prome Minister ta encarga cu e supervision di e ley en cuestion, ta hacie complice di esaki.
Dicon atrobe ta scoge pa MANIPULA? Esaki ta INTEGRO? Ta hopi lamentabel cu un minister encarga e.o. cu INTEGRIDAD ta para bira un GAÑADO y MANIPULADO pur sang! Y esaki djis pa proteha O. Oduber, CTC y muy probablemente integrantenan di e gobierno anterior di POREDmep.
No ta keda mi nada otro pa bis’e e minister, cu el a pega cu e malesa contagioso di gañamento, cu parce di a bira e normal nobo di e Gabinete MEPraiz!
