Ta fundamental pa desaroya un autoestima sano, positivo y e imagen di cada hende muhe of ser. Tin hende muhe den tur sorto di colo, rasa, nacionalidad. Cada un tin e capacidad di explora nan bunitesa na diferente manera y briya pa nan mes tur dia.
Sin embargo, diariamente e hende muhe cada un ta confronta cu critica of palabra menos bunita y te hasta ofensivo cu no ta tur hende muhe ta bunita of atractivo, cu e consecuencia cu psicologicamente e ta destrui e autoestima di e persona, te cu tin consecuencia cu e persona of hende muhe no ta bay perde balor pa di mes y no ta bay sinti su mes valioso.
Hopi ta pensa cu bo mester mustra flaco, diki of na un manera exactamente segun nan concepto pa bo ta bunita cu pa luci bunita bo mester parce un modelo. Di hopi tempo nan a hinca den nos cabes pa bo ta un hende muhe bunita bo mester ta parce un modelo asina bo por ta bunita y exitoso. E ta asina bisto cu di cada 10 hende muhe 9 kier cambia algo di nan aspecto fisico.
Pa por logra tin un vision mas amplio di bunitesa ta importante pa desaroya un autoestima sano, positivo, cu bo propio imagen, importante ta pa bo sinti bo mes bon, ta den bon contacto cu bo mes mentalmente y fisicamente pakico. Pasobra si bo cambia bo aspecto fisico y no cambia bo mentalidad bo autoestima ta keda abou pasobra bo lo mester haya compliment di otro pa sinti bo bon, a cambio si bo autoestima subi, bo lo sinti bo sigur di bo mes mentalmente cu bo ta un ser valioso, cu bo ta balora bo mes manera cu bo ta. Bo ta respeta bo mes y ta laga otro nan respeta bo y cu ningun palabra no por afecta bo facil. Pasobra bo ta kere den bo propio ser, bo lo sinti bon cu bo mes sin importa si bo ta gordo, flaco, cortico, largo, blanco, bruin, wowo cla, wowo scur, etc.
Libera bo mes di imagen cu lo destrosa bo mentalmente y no compara bo mes cu ningun otro hende. Bo ta bunita y perfecto manera bo ta, bo ta un ser maraviyoso.
Resalta tur bo cualidadnan cu ta haci bo unico. P’esaki mi ta sugeri bo e siguiente tip cu por yuda bo sinti bo mes bunita paden y pafo. Ta un par di sugerencia cu por yuda bo cu bo estado di animo y e manera cu bo ta describi bo mes. Mi ta bay duna bo par di secreto cu despues bo por traha bo mes secreto pa bo luci bunita y special.
- Nunca pensa cu bo balor ta basa riba bo bunitesa of titulo.
- Drumi bon. Scoge un dia cu bo ta drumi mas pa bo descansa y recarga bo energia pa bo libera bo mes di stress y tension.
- Resalta e parti nan di bo curpa fisico cu mas bo gusta. No desgaba bo mes pasobra bo ta pensa cu bo ta yen of mucho flaco, etc.
- No perde bo tempo pensando si bo ta suficientemente bon pa haci cierto actividad, meta of hobby cu bo lo kier haci.
- Haci e miho di bo mes pa sinti bo satisfecho.
- Si bo tin trauma cu bo a pasa aden mientras bo tabata mucha cu a laga bo sinti insigur y ta laga bo sinti bo mes poco atractivo, bo no ta sinti bon cu bo peso, bo ta sinti cu bo no ta dje inteligente y identifica loke ta traha riba bo loke ta laga bo sinti menos atractivo, loke ta molestia bo, di e manera aki bo por traha riba e percepcion y di e pensamento cu bo tin asina bo por traha na sanea e concepto cu bo tin di bo mes.
- Tur dia dilanti spiel bo por bisa bo mes e siguiente mensahenan positivo y crea e mensahenan positivo cu bo mes ta haya di bo mes:
- Mi ta bunita
- Mi ta encanta mi cabey
- Mi ta atrae tur cos bon den mi bida
- Mi ta super atractivo
- Mi ta inteligente
- Mi ta sigur di por logra tur locual mi propone
- Mi por
- Mi ta logra
- Mi ta orguyoso di mi mes
- Mi tin hopi balor
- No tene miedo di fracasa of faya. No tene berguensa si den bo pasado bo no tabata sa miho. Corda cu si nunca bo no a fracasa bo no lo tin oportunidad pa descubri bo fortaleza, e balor cu tin den bo.
- Bo curpa ta un instrumento di accion, cu ta respalda bo. Cuid’e bon.
Ban habri nos mente. Purba e tecnicanan aki, p’asina permiti nos mes di ricibi e capacidad pa sinti nos mes mas bunita, renoba nos bida, ta na paz cu nos mes y sinti nos asina maraviyoso. Abo, ami y nos tur merece di sinti nos mes. Corda, bo ta un persona valioso, bo ta bunita y bo merece tur cos bon. Bo ta un diamanta. Stima bo mes y kere semper den bo mes.
