Gobierno y Departamento di Salud a manda su cifra pa e dia di awe y ta anuncia cu Aruba ta duna bon señal pa locual ta e control di contagio di Covid-19. Un total di 23 persona mas a recupera cu ta pone cu awo e cifra pa locual ta trata casonan activo awe ta 175. Mientras ta observa cu tin unicamente 10 caso nobo di Covid-19, di cual 2 ta no- residente, (“positivity rate” bou residente ta 5%)
Total di testnan haci ta 297, testnan haci bou di residentenan na laboratorio di hospital ta 165. E total di casonan di fayecimento relaciona cu Covid-19 ta 36. Hospital di otro banda tambe ta manda su update y ta indica cu tin un total di 12 persona interna di cual 2 den Cuido Intensivo y 10 ta isola riba piso general.
Cifrasnan di casonan positivo hunto cu e “positivity rate” ta bahando, dunando indicacion cu e transmision ta sosodiendo riba un forma limita y manehabel. Esaki sigur ta un hopi bon señal. E virus di Covid-19 lo no desaparese pa awor y e yabi den e pandemia aki ta pa controla e cantidad di contagio of transmision pa preveni cu e cantidad di casonan ta subi demasiado den un corto tempo. Danki na e esfueso di cada uno di nos aki na Aruba nos ta logrando.
Pa nos sigui controla Covid-19 ta importante pa comunidad ta alerto y na prome indicacion di sintoma tuma contacto cu dokter di cas pa por haci un test. Door di isola e casonan positivo nos por controla e virus y stop e di sigui plama.
Ban sigui cuida y practica disciplina consistentemente. Aruba ta conta cu bo pa sigui controla e virus di Covid-19. Uni nos lo Vence!
