Un pickup marca Ford modelo Ranger biniendo riba Pampunastraat a subi Caya Juancho Kock sin duna preferencia. El a raspa front di un Jeep Charokee djey dal y basha cura’i Wit Gele Kruis abou y na final a bolter y bay para poco pabou di Wit Gele Kruis riba un tereno bashi.
E accidente aki a sosode alrededor di 9:00 pm. Bisiñanan a bati alarma mesora na polis mirando cu e impacto tabata uno fuerte. E Jeep cu tabata riba su caminda di preferencia no a ricibi mucho daño material, mas bien ta algun rasca chikito na e bumper dilanti so.
E pickup blanco a bolter por lo menos un biaha pa djey para bek riba su cuater tairanan. Daño material tabata basta, e chauffeur a resulta herida, cu basta sla na cara. Ambulance a presenta na sitio p’asina brinda atencion medico na e chauffeur. Na final e specialista di trafico di polis tambe a presenta p’asina documenta e boksmento aki.
