Cada asegurado di AZV tin derecho pa haya medionan auxiliar cu ta den e pakete di AZV. Tin dos forma con AZV ta cubri e medionan auxiliar aki. Tin algun bo ta haya automaticamente (pues sin haci ningun tipo di peticion) pero tin cu bo ta haya solamente despues di un aprobacion adelanta di AZV.

Propiedad of no

Tambe tin algun bo ta haya como bo propiedad, kiermen e medio auxiliar aki ta di bo persona directo (di bo so). Pero tin algun medio auxiliar cu bo ta haya como un medio presta, kiermen despues di uza esaki, e medio auxiliar ta wordo entrega bek na e proveedor.

Deposito of aporte propio

AZV ta carga e gran mayoria di e gastonan. Sinembargo pa cierto medio auxiliar, e asegurado mester paga sea un deposito (borg) of aporte propio tambe, cual deposito of aporte ta wordo paga directamente na e proveedor di e medio auxiliar. Pa compronde e materia aki miho, ta duna algun ehempel. E medionan auxiliar cu AZV ta duna como propiedad ta entre otro: protesis di pia, protesis pa schouder/brasa, protesis pa pecho (externo, interno), protesis pa wowo, orthese pa torso/schouder/pia of nek, bril of contactlens (dioptrie 10>), aparato pa oido, catheters y saconan special pa cuido.

Presta

E medionan auxiliar cu bo ta ricibi di AZV generalmente ta wordo duna como un medio presta y a base di un deposito (borg). Esey ta nifica cu despues di su uzo, e mester wordo entrega bek y bo ta ricibi bo deposito bek si tur cos ta na ordo. Por ehempel un rolstoel of un aparato di oxigeno. E idea tras di e ‘prestamento’ ta cu AZV por haci uzo di e medio auxiliar pa diferente asegurado. Por ehempel, si ta un rolstoel cu e persona mester pa un periodo cortico, esaki facilmente por wordo presta y despues ora e persona ta cana bon bek, e ta entrega e rolstoel bek na e proveedor. E proveedor na su turno ta haci e rolstoel ful limpi y por entrega e rolstoel na otro persona cu mester. Esaki no ta nifica cu un persona nunca mas no por haya su propio rolstoel. Un asegurado cu si tin mester di un rolstoel paso e tin un malesa cronico, lo haya esaki pa su mes. Cada caso AZV ta evalua detayadamente.

Comments

comments