Tur bista ta fiha ariba por ehempel Departamento di Impuesto (DIMP) cu lo mester percura pa cumpli cu e norma nan stipula den presupuesto.
Tin diferente departamento di gobierno cu ta sigi e trajecto aki di cerka y naturalmente tambe e colegio di supervision CAft. Luenne Gomez-Pieters, directora di DIMP, a splica cu tin hopi trabao cu tin cu sosode ainda den e departamento pa cu esaki y cu Departamento di Impuesto conhuntamente cu Cuerpo di Aduana ta e dos departamentonan mas grandi cu ta genera entrada pa caha di gobierno. E presion ta halto, Gomez-Pieters ta indica, pero e determinacion pa cumpli ta loke cu semper e departamento tin como meta principal. Pa yega unda cu nan tin cu yega pa loke ta entrada di impuesto, ta tuma tambe di e departamento pa traha hopi mas eficiente, pa e procesonan ta bon delinea y tambe pa por atende cu cobransanan manera mester ta.
Pa por logra esaki a stipula un plan strategico cu cada anja tin su meta nan stipula y naturalmente sin lubida e inversionnan cu a wordo aproba door di Parlamento pa mehora esistema di automatisacion, caminda cu nan por ta hopi mas den control di e “non-compliance” ariba terreno di impuesto.
Banda di esaki , tin e ekiponan di control y tambe FIOT, cu ta haci control riba negoshinan, pa asina garantiza cu nan ta raporta y paga e impuesto manera mester ta. E controlnan nan aki ta tuma luga tur aña y lo continua esaki tambe den 2018.
Si mira funcionamento di e controle team durante añanan anterior, por conclui cu ta miyones di coreccionnan tabata tin ariba tereno di BBO, Loonbelasting y e prima nan social, caminda cu a controla bukinan di negoshi cu no ta cumpli cu e pagonan di impuesto manera mester ta.
Si mira presupuesto 2018, Departamento di Impuesto a duna e cifranan caba di e prome cuartal na departamento di finansas y tambe na minister pa asina por raporta na CAft..
Pa loke ta e prome cuartal di aña a raporta 20% na entrada di impuesto di e presupuesto total di 797 miyon florin. Banda di esaki mester menciona cu Departamento di Impuesto ta encarga tambe cu cobranza di prima nan pa AZV y SVb, cobranza di leges pa Dimas y cobranza di e Erfpachtscanon pa DIP.
Presion halto
E presion naturalmente pa Departamento di Impuesto y pa su funcionarionan, ta hopi halto. Esey mirando e cantidad di impuesto y no-impuestonan cu tin cu bin aden pa aña. Pero, segun e directora, Luenne Gomez-Pieters, e ta satisfecho cu e esfuerso y determinacion demonstra durante e promer mita di aña.
