Gobierno a fia 125 miyon dolar na 6.5%: Mas halto cu hypoteca pa cas!

Recientemente Gobierno di Aruba, por medio di Minister Xiomara Ruiz-Maduro, a fia 125 miyon dollar riba mercado internacional. Remarcabel di e prestamo aki ta e interes cu Gobierno di Aruba a paga: 6.5%. Esaki segun e noticiero financiero internacional nasdaq.com. E interes aki ta mas halto cu e interes cu varios banco na Aruba ta ofrece pa prestamonan di hypotheek.

 

E interes aki ta mas cu 2% mas halto cu Gobierno di Aruba, bou un otro signatura y Minister di Finanzas, esta Angel Bermudez, a fia apenas algun luna pasa. Segun e mesun noticiero nasdag.com, Gabinete Mike Eman a cera e prestamonan aki na un interes di 4.21%.

E motibo pa cual e prestamonan aki ta asina mas halto cu algun luna pasa, no ta completamente conoci ainda. Ta specula cu e lo por tin di haber cu e “downgrading” di Aruba dor di agencianan di rating manera Standaard and Poors y Fitch Ratings. E interes cu banconan internacional ta duna, ta depende hopi di e confiansa cu nan tin den e Gobierno y den e Minister di Finansa.

Lamentablemente, den cuadro di transparencia, Minister Xiomara Ruiz no a menciona e interes haltisimo den cual a cera e fiansa, ni tampoco a duna e motibonan dicon banconan tin menos confiansa den nos pais, aumentando nos interes cu mas o menos 2%.