Dianan 2 pa 6 di september proximo, Biblioteca Nacional ta presenta un otro edicion di Sustainable Education Symposium na Biblioteca na Playa. Tema pa e aña escolar nobo aki ta Community Gardening (Hof’i Bario).
Segun Astrid Britten, directora di BNA, a splica durante un conferencia di prensa, despues di lunanan di preparacion esaki ta cla. E scolnan cu lo participa, ta invita caba. Door cu e actividad ta bay tuma luga na BNA, e espacio ta limita. Sinembargo por a yena 5 dia di scolnan cu lo bay participa na e simposio aki.
Scolnan invita ta Colegio San Nicolas, John Wesley MAVO, EPB Oranjestad, Abraham de Veerschool MAVO, IPA, Mon Plaisir College MAVO y Filomena College, MAVO. Tur esaki den cuadro cu nan programa di sostenibilidad, unda cu scolnan ta bin pa haya informacion. E tema aki lo enfoca riba e parti di agricultura. Ta bay tin naturalmente director di Santa Rosa, sra. Nathaly Maduro, kende ta riba e programa. Santa Rosa ta un partner pa diferente aña y naturalmente ta un di e oradornan.
For di Hulanda ta bay tin sr. Henk van Dort. E tin un bunita proyecto na Hulanda, cual ta un Best Practice tambe pa loke ta trata e “Hof’i Bario”. Tin tambe di United Farmers Aruba, Gregory Fung A Fat y tambe Ingela Lacle, kende ta tene su mes bezig cu Hof’i Bario. E ta haci diferente actividad aki. Tambe tin James Ocalia di Goshen Aruba y Josanne v/d Biest.
E oradornan ta conoci. Ta spera cu e programa ta hopi interactivo, unda cu informacion ta wordo duna, pero naturalmente cu e personanan aki cu t’ey cu nan por lansa nan preguntanan. Parti atardi lo tin workshop pa muchanan di scol y studiante (di 6 pa 17 aña di edad) di 2or y mey di merdia pa 4or di atardi den Sala Diamante.
Pa inscripcion por tuma contacto cu Janine of Giselle na 5821580 of via nan website [email protected].
Naturalmente cu e simposio educativo aki no lo tabata posibel sin sr. Ronny Alders, kende ta e iniciador di e proyecto aki, cu ta bayendo pa su di 8 edicion. Cu hopi entusiasmo e ta traha riba esaki, segun Britten.
Apart di full e programa aki cu ta bay tin y tayernan durante e siman di 2 pa 6 di september, tin loke nan ta yama nan “evening of lecture” (anochi di lectura), cu ta bay tuma luga dia 4 di september na Cas di Cultura, pa por acapara mas tanto hende posibel, for di 7’or pa 9’or di anochi.
Iniciador
Segun e iniciador di e simposio educativo sostenibel di Biblioteca Nacional Aruba, Ronny Alders, organisacion di un evento asina ta un reto hopi grandi, pero e ta haci’e cu hopi smaak, energia pa brinda e studiantenan di scolnan secundario, superior y avansa lecturanan di calidad hopi halto di expertonan di Aruba y Hulanda e biaha aki.
E ta tuma luga na Biblioteca Nacional den oranan di mainta. Segun Alders, un biaha mas e scolnan a reacciona sumamente positivo ora cu a yama nan. E scolnan ta kere den sostenibilidad. Nan ta kere cu Aruba mester drenta y ta sigui drenta e era di sostenibilidad.
Biblioteca Nacional Aruba, como institucion educativo, ta un pionero riba e tereno aki cu ocho aña pasa a cuminsa cu e megaproyecto aki pa BNA y pa comunidad di Aruba. Nunca a pensa cu e proyecto aki ta un trendsetter di Sustainable Development Goals di Nacionnan Uni unda Biblioteca, den e parti di sostenibilidad, ta touch e parti aki, e aña aki pa caba cu hamber na mundo. Tambe e parti di educacion di BNA, ta sumamente importante.
Pa BNA ta importante tambe pa e publico, studiante y maestronan sa, cu nan tin buki y materialnan di sostenibilidad, den e caso aki “Hof’i Bario”, den e sala di estudio di BNA tanto na Playa y San Nicolas.. Aki por fia e bukinan.
Nochinan di lectura
E nochinan di lectura ta un parti integral y importante di e simposio. Aña pasa, manera cu full Aruba sa, BNA a yena Cas di Cultura completamente. A conta 850 hende, cu a drenta e edificio. Tabata tin luga pa 575 hende, unda cu oradornan a trece nan ponencianan na un manera hopi bibo. Aworaki tin e oradornan di Aruba cu lo participa den e simposio aki, como tambe esun di Hulanda. Alders a splica cu e oradornan cu ta top of the line. Entrada ta completamente gratis pa publico general. E ta cuminsa 7’or di anochi y ta caba pa 9’or y mey.
Un parti tambe integral di e anochi di lectura aki cu e tema ‘Hof’i Bario’, unda cu ta bay tin e vendornan den sala Unoca (kleine zaal), cu ta habri 6’or di atardi, cu entrepeneurnan local, cu ta bende nan productonan sostenibel na un prijs accesibel pa pueblo. Aki por cumpra y haya informacion. Santa Rosa y BNA ta bay tin nan stand cu ta bay duna informacion kico e dos departamentonan di Gobierno aki cu ta sumamente importante y cu ta trahando hunto pa varios aña caba, ta haciendo. Ta duna e informacion naturalmente na e publico general. Ta spera henter pueblo di Aruba den famia, mirando cu ta un dia di famia tambe, pa asina bin scucha oradornan cu ta top of the line.
