Pa Izaak van der Linden e proposicion cu Arubus a dun’e pa e bay cas, no ta compensa su perdida di trabou. Esey ta e motibo cu e no a acepta e oferta pa cual Arubus a dicidi di bay Corte pa kibra e relacion di trabou.
Abogado mr. Demis Iles a representa van der Linden den e procedura den Corte diabierna mainta. Izaak van der Linden a haya su retiro di inmediato, despues di a pone cierto comentario riba Facebook relaciona cu hendenan canando riba caminda strobando trafico. Corte a yega na e conclusion cu no tabatin motibo pa dun’e su retiro y a ordena Arubus pa tum’e bek y sigui pague for di e tempo di incidente bin ariba.
Pero gerencia di Arubus tabata di pensamento cu no tin base mas pa nan sigui traha pa cual a dicidi di bay Corte pa pidi su retiro. No ta prome biaha cu Arubus a cuminsa un “ontbindingsprocedure”, pero e prome biaha mester a warda decision di e caso sumario cu van der Linden a entabla contra e compania di transporte, cu a sali na su fabor.
Mr. Iles a bisa cu contenido di e caso a keda casi mesun cos cu a trece den e caso sumario, esta cu gerencia kiermen cu nan no tin confiansa cu e chauffeur aki no ta bay pone den practica loke el a bisa riba su Facebook. Esta cu e no ta move pa peatonnan riba caminda. Pero e Abogado un biaha mas a mustra cu henter e cos aki tabata manera un joke entre su cliente y su amigonan riba su cuenta priva di Facebook. Por a mira diferente “smiling face” cu a wordo poni na e diferente comentarionan. Pero pa gerencia e comentario ta suficiente pa finalisa e relacion di trabou.
Su cliente, segun e Abogado, kier sigui traha y ta cumpli cabalmente. Ta berdad cu nan a sinta na mesa cu gerencia di Arubus, cu tabatin un oferta pa e bay, pero no a tuma esaki. “Mi cliente ta di opinion cu placa no ta nada, e ta algo cu ta caba. E tin un par di aña mas pa bay prome cu e yega edad di pensioen y e kier traha. Ademas, awor ta hopi dificil pa e haya un otro trabou cu su edad.”
Corte a keda di informanan momento cu tin un decision cla.
E caso aki ta wordo liga na politica, mirando cu van der Linden a aparece riba lista politico di UPP di Booshi Wever.
