Celebracion di Dia di Himno y Bandera ta tuma luga diferente caminda rond di nos isla. Un caminda cu a tuma luga celebracion aki cu yen di actividad tabata Biblioteca Nacional Aruba.
A combersa cu Astrid Britten director di Biblioteca Nacional Aruba (BNA) cu a expresa cu un aña mas BNA a organisa diferente actividad na su sede na George Madurostraat pa celebracion di riba e fecha nacional di Himno y Bandera.
E director a splica cu ta un gran placer pa ricibi tur e bishitantenan na BNA su actividadnan, specialmente e conocido “mercado di buki” cu ta organisa pa hopi aña y ta bon bishita. Britten a señala cu buki ta un parti hopi importante pa yuda un persona desaroya su conocemento y aki unda biblioteca ta hunga un rol pa facilita e bukinan na comunidad.
Glenda Zavala-Maduro ta coordinado di actividad na BNA y a relata cu tur aña 18 di maart ta celebra e dia festivo pa e publico cu varios stand di cuminda crioyo, e weganan popular cu Hunga Teca, mercado di buki, gruponan di baile y musica tipico.
