Barracudas ta cla pa nan proximo reto

12

Barracudas ta na caminda pa Canada pa asina competi den synchro. Segun Greta Costa, headcoach, tin un diferencia entre e competencia teni ultimo na Barbados y esun na Canada, caminda cu Aruba ta bay competi.

E competencia na Barbados, ta envolve mas e pais den lama Caribe, mientras cu esun di Canada, ta envolve henter e continente Americano, caminda cu tin un cantidad di pais cu ta hopi fuerte. E ta algo manera  weganan Panamericano, unda cu e competencianan ta di nivel halto. Barracudas ta preparando hopi duro pa e proximo competencianan, entrenando tanto mainta como atardi. E atletanan tambe ta haci diferente otro tipo di deporte manera areal y tambe gym cu coachnan specifico. Tambe nan ta haci ballet pa e extension. Nan ta entrenando hopi duro, segun e headcoach.

Pa e competencia na Barbados, nan ta bayendo cu atletanan pa participa den categoria di dos edad, esta bao di 12 como tambe den categoria di 13-15. Esun bao di 12 tin 7 mucha muhe. Nan ta bay landa dos solo, un duet y un team. Esun di 13-15, nan ta bay landa 2 solo, un duet y e team cu ocho mucha muhe.

Prepara

Costa a splica cu semper e ta purba di haya mas perfeccion como coach. E atletanan a mehora hopi den e ultimo temponan. Realmente e ta spera cu nan por mustra tur hende nan mehoracion. Nan a haci hopi bon te awor aki. Aunke ainda nan tin un siman, nan por mehora ainda mas y polish tur cos. Obviamente  synchro ta un competencia di nivel halto. Tur detayenan chikito por haci un diferencia. Realmente nan mester bay y mustra mas perfecto posibel. Nan lo uza e ultimo siman pa polish tur cos y purba di ta riba top di nan presentacion.

Kico por spera

Costa sa cu ta competencia di nivel halto. El a mira e Weganan Panamericano di siman pasa y sa cu tin paisnan fuerte. E nivel lo ta hopi halto. E lo ta contento si e muchanan tin un bon presentacion y pa nan ta satisfecho y mira cu nan trabao lo ta bon haci. E lo kier pa nan bay mas cerca posibel di e paisnan grandi manera Canada, Merca of Mexico.

Cuanto pais

Tin hopi pais cu lo bay competi, por ehempel Canada y Merca lo bay bin cu algun ekipo, y tambe lo ta presente teamnan di Colombia y Mexico. Esaki lo bay ta sigur un competencia basta grandi.