Awemainta sra. Esther Broeksema, director di Aruba Excellence Foundation y su colega sr. Giovanny de Windt tabata na biblioteca pa presenta e publicacion di e Programa di Excelencia Aruba (ATA 2019) titula ‘Mi compromiso cu Aruba’. Esaki a keda entrega na sra. Astrid Britten, directora di Biblioteca Nacional Aruba.
E programa di Excelencia Aruba ta specificamente diseña pa tur hende cu ta traha den e sector di turismo, pa provee informacion corecto y consistente encuanto e producto Aruba como destinacion turistico. E programa ta enfoca riba e mihor servicio posibel cu ‘Zjeito’. E publicacion ta ofrece diferente modulo cu informacion di Aruba pa por comparti cu turista manera e cultura, manera di biba, informacion historico, flora y fauna, historia di turismo. Tambe ta toca temanan manera norma y etica di trabou y un servicio excelente.
Sra. Esther Broeksema a bishita directora di Biblioteca Nacional Aruba, sra. Astrid Britten pa un entrega oficial di e publicacion aki, asina percurando pa e ta accesibel na biblioteca y pa e keda warda den coleccion nacional.
