Ya pa varios dia caba nos ta bezig cu un tema hopi delicado den comunidad. Lisette Gomes ta un persona cu pa hopi aña cu ta hibando un lucha contra abuso di mucha.
E ta conta cu e tema aki, ultimo hopi ta wordo papia riba medionan social, di casonan cu ta sigui pasa. Pa casi 10 aña luchando, ta logrando pa kibra un tabu cual ta mas importante. Pasobra no cu casonan ta pasa mas hopi awo, pero nan ta saliendo na claridad actualmente.
Den pasado tabata tin cierto cambionan berdad y aumento den ley. Pero nos ta keda pega cu e sistema no ta funciona y esaki ta hiba cu investigacionnan no ta cana manera mester ta, entre otro pa via di prueba.Esaki ta hiba cu no tin castigo of e castigonan ta demasiado abao. E ora ey, e logro ta kibra e tabu principalmente y hinca prevencion den comunidad.
Miho forma pa bringa abuso sexual
E arma mas poderoso ta prevencion. Esaki ta hopi importante. Prevencion no directamente na e mayornan, sino na e propio muchanan. For di chikito siñanan kico nan derecho ta, for di chikito siñanan cu nan por papia, nan tin derecho di papia ora algo malo pasa cu nan y no keda keto. Duna confiansa entre mayor y nan yiu y si e mayornan, por ta den e caso aki, tin abusador cu ta mayornan mes, nan por yega na un docente, na un famia, cu si lo para pa nan.
E prevencion ta e arma mas fuerte y poderoso cu tin awor aki pa combati esaki, segun Gomes.
Sconde
Hopi biaha ta trata di berguensa si ta trata di un familiar. A haya casonan cu e mesun persona cu a abusa di e mucha, a abusa di su propio mayor den un manera of otro. E ta un circulo vicioso. Nan a lanta den dje por ta, cu nan ta hay’e algo sumamente normal, cu e abuso ta sigui pasa. Segun Lisette Gomes, e berguensa mas tanto. E mucha tin cu pasa den diferente interogacion. Nan ta scucha eyfo cu no tin ley of castigo y ta prefera pa no keda keto, sin sa di e daño cu nan ta haci na e mucha.
Acercamento
Gomes ta haya hopi caso di abuso sexual, pero esey no kiermen cu ta tur caso. Ultimo tempo ta hayando bastante caso pa siman. Casonan nobo, casonan cu a pasa hopi tempo caba, cu e mucha a papia despues. Tin un confiansa eyfo den comunidad den e fundacion cu ta hiba Lisette su nomber. Loke a saca afo ta minimo. Ta un caso den 100 por bisa, no ta saca tur caso afo. No ta saca tur informacion afo tampoco. Ta trata lo mas hopi posibel pa cuida e identidad di e mucha principalmente y ta purba di parti di e fundacion, conseha y mustra nan e caminda pa cana y haya ayudo mas lihe posibel.
Kico nos por haci como comunidad
Lisette Gomes a splica pa no keda keto. Denuncia, maske directamente. Awor aki no por haci denuncia, pero bati na un bel. Un hende mester por yuda. Bay polis, mayor. Keta keto no ta bay yuda ningun hende na nada. E mucha bo ta perhudica mas. Ora cu mucha papia, tin mayor no ta kere nan. Of un docente,ken cu el a acerca y e mucha ta perde e confiansa den e adulto, cu ya nada no a wordo haci of no tin husticia. Ban kibra e silencio. Esey ta loke a bin ta bisando pa hopi tempo caba. Papia y denuncia. Ta spera cu pronto tin un ley caminda cu profesionalnan cu ta traha directamente cu mucha, por haci denuncia directamente pa asina por stop casonan asina, pa e personanan aki wak cu tin ley, tur cos ta in place y nan mester ta hopi cuidadoso kico nan ta bezig ta haci. Tin castigo entre otro y pa nos muchanan lanta mas flink. Cu mas voz pa nan por vocifera nan mes y conta. E problema mas grandi cu nos tin ta cu e muchanan ta keda keto y door di menasa tambe tin biaha. Como mayor bo mester tey eynan pa e mucha y splik’e cu no importa kico un hende bisa, e mayor semper tey. Pa e confiansa bin dilanti pa e mucha por confia.
