Recientemente Organo Ehecutivo AZV (OE AZV) a haya bishita di RGC Activa S.A.S di Colombia e organisacion di auditoria cu ta traha cu OE AZV pa monitoria e hospitalnan na Colombia. Germán Fernández, representante di RGC Activa S.A.S ta conta cu nan a biaha pa Aruba pa presenta e resultado di nan trabounan na OE AZV.
RGC Colombia ta un compania di auditoria y facturacion den sector di seguro y sector medico. Cu casi binti aña di experiencia y un total di 330 trahado; nan ta domina e tereno di auditoria na Colombia trahando pa dies cliente di renombre na Colombia (e.o. Colsanitas, Seguros Bolívar, AstraZeneca) y dos cliente internacional di cual Aruba (OE AZV) ta un di nan.
Resultado
Un punto cu a keda confirma ta cu e cuido medico cu OE AZV ta cumpra for di Colombia ta di hopi bon calidad ya cu tin contracto cu e hospitalnan di mas “top” di Colombia. Y esaki no ta algo cu RGC Activa S.A.S so ta confirma, sino mas bien cu diferente otro instancia a sa di comproba esaki pa medio di e diferente acreditacionnan como resultado di diferente evaluacion (y midimento) otorga na e hospitalnan aki. Asina mes, durante auditoria y inspeccion di RGC Activa S.A.S a logra rechasa -den nomber di OE AZV- 2% di e facturanan manda te cu awor den 2023, sumando un total di alrededor di 145mil dollar Mericano. Cu e resultado aki ta logra pa mantene cada hospital di Colombia skerpi den nan forma di factura cerca OE AZV.
Servicio nobo
Hunta di Comisario di OE AZV como tambe director di OE AZV ir. Edwin Jacobs ta hopi satisfecho cu e resultado presenta. Segun OE AZV RGC Activa S.A.S ta un partner clave pa OE AZV pa asina mantene un bon control riba e gastonan di cuido medico na Colombia pero sigur tambe pa crea e espacio pa mehoracion den otro area. Bisando esaki, Germán Fernández a confirma cu banda di e servicio di auditoria awor tambe lo start cu un servicio nobo.
Expectativa
E servicio nobo ta e auditoria di e proceso di haya cita (consulta) na Colombia. Aki ta unda RGC Activa S.A.S. lo percura pa sostene di mas cerca e proceso di yega Colombia pa e prome cita te cu e agenda di e siguiente citanan. E sosten aki tin como meta pa mehora y asina percura pa e citanan cu e hospitalnan cana mas lihe (hopi mas eficiente). Un miho conexion entre e yegada di pashent (y su acompañante social) na e 1e cita cerca dokter na Colombia te cu e 2do (of siguiente) cita sigur lo beneficia e experiencia total di tratamento medico di e pashent.
Igualmente e servicio nobo aki lo beneficia fondo AZV unda lo percura pa tin multa (boet) pa e hospitalnan cu no mantene nan mes na e palabracionnan (huridico) di e contracto entre OE AZV y nan pa loke ta trata e.o. e tempo di espera entre e citanan. Loke tambe lo bira algo nobo ta e echo cu awor cada cita cu keda cancela fuera di e alcance di OE AZV y of e asegurado lo cay bou responsabilidad di e hospitalnan mes. Por ehempel si un asegurado ta biaha pa su cita dialuna y ta yega e cita y e hospital ta cancela e cita pa motibo di aparato cu a kibra of cualkier otro motibo, e ora ey ta e hospital mes ta carga e responsabilidad pa reschedule e cita y pa percura pa traha un cita mas lihe cu ta posibel.
Gradicimento
OE AZV ta gradici Germán Fernández, Diana Ramirez y Jaider Fernandez pa nan tremendo presentacion y bishita na OE AZV. Igualmente Hunta di Comisario y directiva di OE AZV ta gradici henter e team di OE AZV cu a participa na e diferente reunionnan hunto cu RGC Activa S.A.S. Ta sigui reforma pa garantisa AZV pa futuro generacion.
