Corte a haya Filomena Maduro, ex-hefe di cahera na Departamento di Impuesto culpabel di malversacion. For di e abogado mr. Desiree Croes, por a compronde cu nan lo apela e sentencia aki.
E sentencia tabata diahuebs den oranan di merdia y a informa e acusado cu a hay’e culpabel di a malversa un suma grandi di placa den e periodo di 23 di juni 2016 pa maart 2020.
Ta papia di un suma di riba 800 mil florin.
Como prueba pa yega na e condena, hues a menciona e cantidad grandi di formularionan cu a haya scondi den su oficina. A conta e suma cu ta aparece riba e formularionan cu a haya scondi den su oficina y esaki tabata 647 mil.
Tur e formularionan aki tabata firma di e acusado riba dje. Y esnan otro tabata firma pa su reemplasante, kende a declara cu tur e formularionan e tabata entrega despues na Maduro.
Den e dossier tambe ta para cu incluso formulario di un destaho publico cu a tene a bin haya scondi den su oficina. Ta papia di un suma di casi 39 mil florin. Y e tabata esun cu a atende cu e proceso aki. Nunca a entrega e placa aki.
Tur pero tur loke cu a haya di un forma of otro a pasa den man di e acusado aki, hues a splica durante lesamento di e sentencia.
Loke cu e abogado a trece como defensa riba e camaranan di siguridad, hues a bisa cu den e kluis mes no tin camara y ta su cliente ta e unico cu tin yabi di e kluis.
Pa dos aña el a traha su so eynan. Pues no tabatin colega cu por a mira algo prome cu e compania di transporte busca e placa atardi y trece bek e siguiente mainta.
Y e fastioso tabata cu departamento di Comptabilidad no tabata controla e documentonan di e caheranan.
E conclusion pa corte ta cu no tin ningun otro hende cu por a bay cu e placa aki si no ta e acusado Maduro. Loke ta hunga contra dje tambe cu e ta hunga wega di placa den casino. Y a perde hopi placa.
Na final a dicidi bay di acuerdo cu e exigencia, esta 3 aña di cual 1 aña ta condicional y dos aña di prueba. Den e ontnemingszaak cu a papia di un suma di 1.3 miyon no a tuma un decision ainda, sino te cu 28 di october.
