Organo Ehecutivo di AZV a nombra drs. Olga Rodriguez como manager division di cuido entrante dia 1 di januari 2024. Rodriguez ta dispone di un bachelor den Fysioterapia y un master den maneho y administracion di cuido. E ta conta cu experencia den maneho di cuido tanto na
Hulanda como na Aruba, a fungi como project manager na AIB Bank y desde 2006 ta den servicio di dr. Horacio Oduber hospital.
Na dicho instituto, Rodriguez a ocupa funcionnan di consehero riba calidad, ICT-projectmanager, manager cluster Medisch Ondersteunend en
Poliklinieken y ultimo como Manager Business Development.
Sigur su conocemento y experencia amplio den cuido den diferente funcion, su experencia den maneho di personal y su afinidad financiero lo duna un bon contribucion den realisacion di un cuido accesibel, di bon calidad, eficaz y pagabel na AZV.
Cu e nombracion aki e constelacion di e team di maneho di AZV awo lo consisti di mr. Cristina Rademaker, hefe asuntonan huridico, na mes momento reemplasante di director; drs. Olga Rodriguez, manager division cuido; Roccini Anthony RA, manager division financiero y ir. Edwin Jacobs, como e director general.
E manager actual di e division di cuido ta dr. Joost Samuels, pero e ta baha cu pensioen dia 31 di december 2023.
