Un gran berguensa ta spera esnan cu a rechasa Dios,
Esunnan cu nenga su Yiu Cristo Hesus,
Esunnan cu ta haci bofon,
Esunnan cu ta rebeldia,
Esunnan cu kier cambia e naturalesa den cual nan a nace,
Esunnan cu no tin temor di Dios,
Esunnan cu ta biba bao di dominio di idolatria, santeria y bruheria.
Esunnan cu ta sigui biba den pica boluntariamente (Galationan 5:19-21) (1 Corintionan 6:9-10) y no kier arepenti.
Kico lo ta nan berguensa? Nan berguensa lo ta cu na momento di e huicio di Dios cu tur hende mester pasa aden tuma lugar (Revelacion 20:11-15), nan lo no drenta shelo pero lo ta tira den e lago di candela. Pasobra si un hende no entrega su bida na Cristo Hesus, su nomber no ta aparece den e buki di bida.
Awo locual ta moviendo riba mundo henter, ta un spirito di rebeldia, den cual hende no ta respeta Dios y nan ta haya tur sorto di apoyo necesario pa bay contra e palabra di Dios.
A saca Bijbel for di scol, p’asina introduci cos cu no ta agrada Dios na scol y esaki no ta awe e asunto aki a cuminsa. Ror di tempo cu a elimina Bijbel for di scol, maldad a drenta scol.
Cual awe nos tur ta mira e resultado tristo cu tin y cu mundo henter ta pasa aden, pasobra e enemigo kier domina scol
Tur hende ta ripara con e fe den Dios a baha hopi riba e mundo aki, hende no ta kere manera antes, no cu hende a bira sabi, pero immoralidad, paranda, libertinahe, doctrina falso y maldad tin hopi mente domina.
Pasobra scritura ta bisa cu ken cu kere den Dios, lo no keda na berguensa. (Romanonan 10:11).
Ta tempo pa nos tur kere den Dios mas cu nunca, pasobra ta Dios ta nos unico alternativa, nos no por bay ningun otro caminda si no ta cerca Dios, como yiu di Dios nos no por desvia den caminda di scuridad. (Juan 15:5).
Y sin fe ta imposibel agrada Dios, pasobra esun cu ta bin cerca Dios, mester kere cu E ta Esun cu ta recompensa esunnan cu ta busc’E. (Hebreonan 11:6).
Hopi hende ta cana rond bisa cu nan tin Fe den nan mes y esey no ta berdad, pasobra ningun hende por yuda su mes, ora bo ta malo of den necesidad of den nos bida di tur dia nos mester di Dios pa rosea y forsa.
E husto lo biba pa medio di fe y si e hala atras. Mi alma no tin placer den dje. (Hebreonan 10:38).
Ta bon pa nos como mayor haci tur locual ta na nos alcance pa aumenta e fe den Dios den nos yiunan, pasobra e scuridad di mundo ta hopi activo riba e hubentud.
Maldad, inmoralidad, rabia, odio, orguyo ta persigui hubentud pa nan entrega y asina ta domina p’e malbado, y ta nos trabao como nan mayor pa yena nan cu e palabra di Dios, pa nos ta un bon guia pa nos yiunan.
Laga nos kere den Dios cu seriedad den nos curason, pasobra nos curason ta nos representante, dilanti di Dios. Dios ta wak nos curason, pasobra tur locual ta bon of malo ta sali for di nos curason.
E señal aki lo sigui esunnan cu ta kere den Cristo Hesus, esey ta locual e palabra di Dios ta siña nos.
Laga nos mantene nos fe den Dios , pasobra Dios ta tur cos pa nos.
Sinceramente Pastoor Marcel Balootje
