Un delegacion di Partido di Pueblo Arubano (AVP) a sinta diahuebs mainta cu representantenan di ATIA, Camara di Comercio y Comerciantenan Uni Aruba pa un intercambio di pensamento riba e proposicion cu fraccion di e partido a entrega na Parlamento pa crea na Aruba un Sociaal Cultureel Plan Bureau. E obhetivo ta pa comunidad, gobierno y parlamento conta cu un instituto cu por midi tur factor socioeconomico cu ta afecta comunidad.
Actualmente mes tin un bon ehempel di e necesidad di un entidad asina ora cu cifra di turismo ta papia di crecemento, mientras cu tin cantidad di empresa ta bati bancarota pa motibo cu e costo di haci negoshi ta demasiado caro. Na Merca ta referi na esaki como “Wall Street” vs “Main Street”, cifranan por parce bunita pa un sector, pero otro sector, hopi bes esun real y nacional ta den recesion. Aruba nos tin un “Hotel Street” cu ta wak turismo crece, pero e empleado, e chauffeur di taxi, e empresario chikito no ta bay dilanti, e Mainstreet di Aruba no ta mira e mesun prosperidad.
Segun e partido berde, tin un desconexion e modelo economico y e realidad cu e comunidad ta biba; anto riba nivel politico, nos gobernacion ta papia di surplus mientras pueblo ta sclamando cu no tin placa pa paga remedi, schoolgeld y ta biba bou di e bestaansminimum. Kiermen e sistema politico a desconecta completamente for di e realidad cu e pueblo ta bibando na e momentonan aki.
Representa pa Herrick Henriquez di ATIA, Gavril Mansur y Martijn Balkestijn di Camara di Comercio y Francis Saladin Jr. di CUA, comercio a dialoga cu e delegacion di AVP a consisti di entre otro di e parlamentarionan Sevinger, de Meza, Dowers y consehoro di fraccion Wendrick Cicilia. E encuentro aki a tuma luga na sede di ATIA na Dakota.
E partido mas grandi di oposicion a amplia su argumento indicando cu por mira un deterioro fisico tur caminda; bario, scol, edificio y caminda cu no ta manteni, mientras gobierno ta papia di surplus. AVP kier mira un economia cu tin rendimento pa tur hende y cu tur hende ta bay dilanti. Esey ta locual mester cambia y conecta bek economia na e realidad, na e beneficio pa e pueblo, n’e necesidad di e pensionado, di e empleado, di e muchanan di scol, pa e famia por tin un bida husto.
Tin mester di un vision nobo cu banda di CAFT cu ta controla nos presupuesto, tin instituto cu ta wak tambe kico ta e realidad socio-economico di nos hendenan. Tin mester di instituto cu ta haci e calculacion y analisisnan ey y esey ta locual un Sociaal Cultureel Bureau ta haci.Dialuna Eman ta biahando pa Hulanda pa propone e concepto aki.
Splicando e pakico ta importante pa bo tin un bista completo di e situacion, a menciona como ehempel cu no por core un auto, ni tampoco bula un avion sin tin un dashboard completo di meters. “Bo no por wak un meter so, bo tin cu wak si e auto ta cayente, si e ta charge, cu cuanto velocidad bo ta core, si tin suficiente gasolin…, bo tin cu wak henter un dashboard. Na e momentonan aki ta wak un meter so pa bisa cu cos ta bon na Aruba, pero no kier wak cu cos ta hopi dificil pa nos comunidad.”
