Diaranzon 9 di Mei ultimo na Sandra’s Garden a tuma luga e ‘tiramento di lot’ pa determina e schedule di e etapa inicial di Play-off cu lo cuminsa Diabierna 18 di Mei venidero. E ekiponan clasifica a wordo otorga un number pa via di tiramento di lot.
Britannia a haya number 1, Estrella number 2, Nacional number 3 y Dakota number 4. Eynan e number a wordo aplica den un “schema” di e weganan cu ya a wordo compone di ante mano caba.
E Play-off lo consisti di un systema “round robin” unda tur e cuater ekiponan lo enfrenta otro dos biaha, e dos ekiponan cu mas puntahe na clausura di e ciclo ey lo bay hunga e ‘Final’ cuminsando dia 27 di Juni venidero.
Den e cuadrangular “round robin” nr 1 Britannia y nr 2 Estrella lo hunga e prome wega Diabierna 18 Mei pa 8pm na CDGT, sigui pa e di dos wega cu lo ta entre nr 3 Nacional y nr 4 Dakota riba Diasabra 19 di Mei pa 8pm tambe na CDGT.
A funda Arubaanse Voetbal Bond (AVB) na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur nos isla, incluyendo e muchanan, hoben, hende muhe y adultonan. Nan ta responsabel pa sanciona e torneonan di futbol organisa pa mayoria liga. E oficina di AVB ta situa den Compleho Deportivo Frans Figaroa na Noord.
