Cualkier persona cu lesa e rapport di autopsia di Khaleesi lo comprende cu e condicion den cual a hay’e e lo no por a sobrevivi. Y sigur e no tabata den un situacion pa un periodo cortico, manera e doño Alberto Groeneveldt a duna di conoce recientemente.
E reaccion aki di Groeneveldt a causa hopi repudio pa e forma con e ta trata di duna un splicacion na e sucedido. E ta bisa cu e cacho cu el a yama “Blacky” no tabata pa hopi dia den e estado ey y cu el a kere cu e otronan den e cas, door cu e tabata hopi druk, lo a percura pa e cacho y su puppynan recien naci.
Boluntarionan di Luna Foundation hunto cu boluntarionan di otro organisacionnan similar a duna un man pa saca Khaleesi, y su puppynan, for di e situacion penoso den cual nan tabata. Un echo cu a tuma luga na final di luna di maart ultimo.
E imagennan cu a bira viral tabata papia pa nan mes. Niun bestia ta yega den e estado ey durante dos dia. E mester tabata un situacion persistente. Y esaki ta loke por lesa tambe den e rapport di lijkschouwing haci na clinica di Veterinario Contreras dia 3 di april.
A haci e procedura aki tres dia despues cu Khaleesi a hala su ultimo rosea y e contenido ta mustra cu tur e splicacion di Groeneveldt no tin sentido ni ta hustifica. Y tampoco e tono cu e ta uza contra esunnan cu a rescata e bestia aki y tur otro cu a condena e situacion.
E ultimo oranan penoso cu el a pasa den e estado cu a hay’e tabata e causa di su morto. Un lesion na su nek debi na negligencia.
Con e lesion aki a surgi? “E lesionnan tabata causa pa un chocamento lento y largo door di ta mara na un cadena di hero demasiado grandi y pisa na un mata y a bandon’e pa su destino tristo, di negligencia largo hunto cu su seis puppynan di nuebe dia bieu.” Asina ta para den e rapport di veterinario, cu a yega den forma anonimo den nos inbox.
Den e mesun rapport por lesa tambe cu for di momento cu a yega cu ne na e clinica, dia 31 di maart, Khaleesi (e nomber duna na dje) tabata hopi serio y cu peligro pa su bida. A simpel bista su luchtpijp y adernan na su garganta tabata visibel. E tres musculonan grandi cu normalmente ta tapa y protege e structura delicado aki, tabata corta door di e cadena di hero pisa na cual e tabata mara pa un periodo basta largo. Pues e cadena a corta e musculonan. Esaki no ta algo cu ta sosode den un ni dos dia.
Pues e herida habri na su nek y e musculo, luchtpijp y cuero rond di dje tabata morto caba y tabatin bichi di musca cu ta bini riba holo putri di e herida habri di Khaleesi.
Banda di esaki, y por a mira esey riba e potretnan saca na e sitio mes, cu su cabes tabata hopi hincha. Dobel mas grandi cu normal.
Di con e cabes di Khaleesi a bira asina grandi? E lesion aki ta causa pa e no tin circulacion, causa pa e presion fuerte di e cadena di hero riba e adernan na su nek, y cu a stroba cu e sanger cu ta bini di su cabes ta bay directamente na su curason.
Banda di tur e lesionnan ariba menciona, e tabata deshidrata pa cual ora cu a yega cu ne tabata dificil pa pone catheter. Tambe a constata cu e tabatin un anemia pisa pa motibo di e carpantenan riba dje.
Su sanger tabata hopi abou, perdida di peso formal y caida di musculonan, causa pa e echo cu e no tabata haya cuminda.
Riba un score di 1 pa 9, a cataloga e condicion di su curpa como un (1). Tur su wesonan tabata visibel; herida habri (manera describi caba) y e no tabatin nada di lechi pa su puppynan. Na su tripanan tambe a nota un buraco chikito, door di e presion di cadena riba e organonan ey y finalmente a haya infeccion. E pulmonnan tabatin aspecto di infeccion y sangramento, un consecuencia di pulmonia causa pa e buraconan den su luchtpijp y tripa.
E general e no tabatin mas tehido di vet y e musculonan en general tabata den estado decai. E señal cla di desnutricion cronico y infeccionnan. Tur su organonan tabatin un aspecto bleek.
Pues e rapport aki ta papia palabra cla.
