Diabierna pa 7:45PM riba e caminda di Savaneta a sosode un accidente entre dos auto. E chauffeur di e Nissan March color briun a para pa laga un peaton crusa caminda, pero e otro chauffeur no a regula velocidad di su auto na tempo.
Consecuentement e Nissan March a bay dilanti y dal e peaton. E auto cu a ocasiona e accidente a bandona sitio. Polis a presenta na e sitio y a tuma informacion di loke a pasa. E chauffeur di Nissan March a bisa polis cu e no a mira ki marca di auto di esun cu a dal su tras. Tampoco el a alcansa mira number di auto.
Tambe a pidi presencia di ambulance pa atende cu e peaton cu tabata herida. E paramediconan a opta pa hiba e peaton hospital, unda cu e por haya atencion medico mas avansa.
