Aunke ta den un situacion dificil: Ta drecha centro deportivo pa stimula deporte

Desde e ultimo simannan diferente veld rond Aruba ta hayando un bon limpiesa. Minister di Deporte Dangui Oduber ta contento di por a cumpli cu e peticionnan haci na su persona. A pesar cu Aruba ta pasando den un situacion hopi dificil Ministerio di Deporte ta keda purba coopera y contribui cu deporte te unda ta posibel.

Ministerio di Deporte a entrega diferente proyecto caminda a haci limpi, a verf y drecha edificio n’e veldnan. N’e veld di Centro di Bario Playa Pabou a tuma luga trabounan di limpiesa y a pone graniet p’e muchanan por haci uzo di e veld un biaha mas.

E maneho di minister Dangui Oduber ta dirigi riba mehoracion di infrastructura di deporte, p’asina stimula participacion activo di comunidad den deporte. Tambe pa percura pa tin iluminacion y turf articial na e clubnan. Minister Oduber ta sigur cu e trabounan haci na diferente veld, centro di bario y clubnan rond di nos isla lo duna un empuhe na principalmente nos hobennan pa practica e deporte di nan gusto den un ambiente sigur.

“Nos ta sigui traha na e desaroyo positivo di deporte. Tur caminda cu nos por contribui nos lo contribui,” minister Oduber a termina bisando.