Awe a tuma luga eleccion pa presidente y vice-presidente di Parlamento. E aña tabata tin hopi reto pa algun parlamentario, mientras pa otro esaki no tabata e caso pasobra tabata falta reunion y transparencia.
Lider di Fraccion AVP, Marlon Sneek, ta haya cu e p’e aña parlamentario aki tabata uno hopi pober pa loke ta trata reunionnan publico. Den nan concepto gobierno a uza COVID pa sconde tras di esaki y no sigui cu cosnan hopi importante p’e pais aki. A mira cu e presupuesto di e aña aki uno ficticio, ta mira cu a bay pidi pa fia 1.4 biyon florin den e presupuesto aki y nan sa cu esey no lo pasa. Hulanda no a dun’e esey y no a duna espacio pa haci prestamonan aki.
Dia 1 di september a yega y presupuesto 2021 no a yega Parlamento, esey ta kibramento di mesun reglanan manera tempo e integrantenan aki tabata den oposicion tabata bringa p’esaki yega Parlamento riba e fecho ey. Bou excuus di COVID a cera e tribuna, tur caminda luga a habri pero na Parlamento so o a habri ni pa prensa ni publico. Esey ta parti esencial di democracia, asina Sneek a bisa. Nan ta scondi tras di COVID pa no tin transparencia manera pueblo ta pidi.
Vice-presidente di Parlamento Alan Howell e expresa cu e aña tabatin yen reto, manera recupera situacion financiero. A bin haya reto di COVID-19 y awo ta biba un situacion cu Hulanda cu e parti financiero, di tin impasse. E parlamentario ta haya cu e aña tabata uno exitoso, di a haci tur loke tabata na bienestar p’e pais. A pesar cu e ta sostene e gobierno, e ta critica nan tambe y como parlamentario su rol ta pa controla gobierno. Howell ta contento cu a kere den dje y cu nan a reeligie como vice-presidente, di cual e lo sigui traha na bienestar di Aruba.
Parlamentario Independiente, Daphne Lejuez, a indica cu parlamentarionan tabata tin hopi reunion y reto. E periodo 2020 tabata tin tiki mas reto y ta sinti cu a yama hopi reunion na ultimo momento. E proceso democratico no tur ora a respeta esaki, pero di otro banda parlamentarionan a purba haci nan esfuerso pa locual tin. E ta spera p’e aña venidero por ta un tiki mas miho. Si tur cos bay bon lo tin hopi cambio na caminda segun e persepectiva.
Tin e aña parlamentario nobo y tin retonan, p’esey Lejuez no por duna su opinion ainda riba esaki. Ainda ta depende riba e decision cu tin di tuma. E ta kere cu e siman aki lo duna un confirmacion di kico ta bay pasa si ta firma of no y kico esaki ta contene, si a haci algun cambio, si a yega na negociacion di e paketenan presenta of rijkswetten. Tur esey ta depende di kico a dicidi prome cu bisa kico ta e tarea di Parlamento.
Hendrik Tevreden, parlamentario di MEP, ta mira e aña uno cu hopi reto pero ta mir’e di un forma positivo. Aruba tin un chens di crece y bay dilanti, compara cu otro paisnan den Caribe. El a sigui expresa cu Aruba ta den bon track pa loke ta trata turismo y gobierno a presenta un masterplan hopi positivo. Ta spera cu e culminacion di aña Parlamentario bieu ta habri esun nobo mas positivo y cumpli cu promesanan y plan pa Aruba.
E apertura di Aña Parlamentario 2020/2021 lo ta uno diferente, pasobra e protocol di COVID ta haci cu no por a invita tur invitado manera custumber. No por tin publico ni militarnan y asina mantene na e reglanan di COVID. Lo conta cu presencia di Gobernador, pero e lo ta un reunion cu e protocol nobo y evita contagio.
