ATIA: Consecuencia di Black Out ta serio pa comercio

1196

“Aruba y comercio a wordo sorprendi cu un blackout awe mainta. Pa comercio e interupcion di coriente aki ta causa un interupcion den servicio y benta di producto, riba un diabierne crucial pa comercio”, asina Ronald “Ronnie” van Trigt, Presidente di ATIA a duna di conoce. E organisacion di comercio ta compronde cu un fayo semper por pasa, pero e consecuencia pa comercio semper ta impactante.

“E prome lunanan di aña ta lunanan dificil caba pa comercio pa motibo di un cantidad di dia liber cu ta cay net den dianan cu ta haci cu negoshinan tin dificultad pa opera of yega na metanan di benta. Hopi negoshi ta trata di wanta cabes riba awa y perde un extra dia of paar di ora di benta of servicio no ta yuda. E consecuencia pa nos economia y comercio ta serio”, di acuerdo cu Eonnie van Trigt.

ATIA a nota un reaccion rapido di parti di WEB y Elmar tratando di resolve e problema cu un boiler y reanuda suministro di corrente. “ATIA ta spera cu ta un incidente isola y cu comercio lo por reanuda dunamento di servicio y benta di producto mas lihe posibel y cu e interupcionnan aki wordi controla pa asina no causa mas daño na comercio y nos economia”, asina Ronald van Trigt a termina bisando.