“Aruba a habri aña cu noticia desagradabel na unda un hoben den su pleno hubentud a mata un persona y esaki a sigui asina y nos ta tumando e direccion robes na unda reglamento di cuenta lo ta algo normal. Na hopi pais den Caribe e fenomeno aki ta algo cu ta tumando luga for di basta decada y autoridad a laga esaki sali for di man y awor ta dificil pa domina e situacion. Ya ta bay caba e aña aki pa varios asesinato den e estilo aki. Estilo gangster yega y tira den cabes, pa ta sigur cu e persona ta fayece.
Di unda esaki ta bin? Ilegalnan ta sigui drenta nos pais y hopi di nan cu droga y arma. Unda e radar cu a costa miyones a keda? E no ta suficiente moderno pa detecta na momento cu algo ilegal ta tumando luga den nos awanan? Of e ta segunda mano pa complace amigo? Unda Guarda Nos Costa ta keda, cu tur nan ekiponan moderno cu nan ta ekipa cu ne? Si no por pidi Hulanda manda profesionalnan ariba e tereno aki pa bin asisti nos, mescos cu tabata e caso durante e prome brote di e pandemia. Rond Aruba bo tabata wak pantserwagen y ariba lama botonan special di Guarda Nos Costa Hulandes. Aruba a sinti’e hopi sigur, no tabata tin ilegalnan cu tabata drenta nos pais, ni droga, corda arma.
Ningun politico ni den gobierno o den oposicion ta wak e peliger grandi cu ta den nos rais caba. No ta cuestion na cual partido bo ta pertenece, ta cuestion con bo por salba loke por ser salba. Ningun hende por tapa nan wowo pa e realidad cu droga tin nos hobennan den un perdicion completo, sea nan ta percura pa desunion den famia, bringa hasta cu mayornan y welonan y esaki no ta suficiente, awor ta reglamento di cuenta estilo gangster. Nos grandinan den hopi caso no por biba un bida trankil mas y ta ser menasa y hasta golpia pa nan propio nietonan. Ta ami so ta lesa noticia y e politiconan?
Politiconan ta ser paga pa haci nan trabou, pa garantisa siguridad den tur sentido di palabra ariba tur tereno.
Den Parlamento tin 3 ex polis, den rango halto, unda boso contribucion a keda? Boso no ta wak e realidad, boso no ta lesa medionan y keda na altura loke ta pasa den nos comunidad,
Aruba ta basta, no por sigui cu hendenan cu no tin nos pais na curason, cada cu mi lesa con mayornan, welonan ta ser maltrata y awor tanto hoben na un edad hoben ya ta comete asesino, mi curason ta haci hopi dolor. Ta for di mi hubentud, cu apenas 13 aña mi a cuminsa traha pa nos hubentud, fundando club hubenil Connie Francis Club y organisa otro actividadnan pa nos hobennan di e tempo ey.
Mi rumannan stima, pa mi nos hobennan cu ta e futuro di nos pais ta bin na prome luga, si e balor y autoestima aki bay perde, esaki ta nifica cu grandemente fundeshi di un pais ta ser sacudi formalmente. Man na obra prome cu ta laat.
MI ta termina e articulo aki cu e frasenan cu Honorabel Miembro di Parlamento sr. Ricardo Croes a termina su entrevista den e programa di FADA. kere mi cu esaki a yena mi wowonanan cu lagrima.
Ricardo a bisa: Hobennan no haci sex, uza alcohol ni droga prome cu bo ta suficiente madura pa tuma e decision pa haci esaki. Aki ta experiencia ta papia y e experiencia aki el a comparti cu su pueblo.
Atan Lee sr, boso humilde sirbido cu ta resa pa boso y stima boso hopi.
