E no mester ta un sorpresa pa ningun hende. E crecemento di 24ora.com banda di desaroyonan tecnologico y digital ta haci e surgimento di un corant digital como un paso logico. E compania Headlines Group, e cas editorial di e website di noticia mas mira na Aruba, esta 24ora.com, ta kere den diversificacion y mas uzo di e contenido di noticia cu nos ta produci diariamente. No ta un secreto cu e agencia di noticia ta produci mas contenido cu cualkier otro medio di comunicacion tradicional riba nos isla. Cu un ekipo di riba 30 colega dinamico, entusiasma y cu hamber pa noticia, ta percura tur dia pa noticia fresco y cu ta interesa e comunidad di Aruba.
E storia di Headlines Group ta bay bek te na nacemento di e website di noticia dia 28 di maart 2007, funda door di nos director, Mark-Benson Denz. E “idea” di dje como studiante na Hulanda tabata pa por a haci noticia local mas accesibel na otro studiantenan cu no ta haya corant di Aruba cumpra eynan. E idea ey a desaroya y despues di 13 aña, awe e ta e medio di comunicacion di mas grandi na Aruba, no solamente den cantidad di empleadonan, den cantidad di contenido y danki Dios, den cantidad di benta tambe.
E idea a nace di masha tempo
Algun aña pasa a surgi e idea pa desaroya un corant tambe. Ta nota cuanto storia e agencia di noticia ta produci diariamente, tanto di suceso, noticianan local, entrevistanan propio y casonan di ciudadanonan cu ta keha pa un of otro motibo, anto ta mas cu bisto cu tin suficiente noticia pa yena no un, sino dos corant. Pero circunstancianan a haci cu cada bes atrobe e plannan tabata baha den e lachi di prioridad.
E aña aki, memey di pleno pandemia, e idea a surgi y subi den e lachi di prioridad di e compania. A traha simannan largo riba e concepto, riba diseño di e website y riba diseño di e pagina mes. A sali for di e punto di bista cu si ta bin cu un corant, e mester ta mas grandi cu tur otro. Mester sali como e corant mas grandi di Aruba, den cantidad di pagina y contenido. Asina so por yega mas cerca di e mercado cu nos ta buscando, esta di lesadonan cu ta interesa den mas y miho contenido di noticia, banda di un variacion sin igual pa scoge for di dje.
A investiga e mercado
Den e proceso tambe a sali afo, cu den nos investigacion di mercado, cu e mayoria ta prefera un corant digital y no imprimi riba papel den forma tradicional. Awendia publico kier lesa tur cos for di nan celular, for di computer of di nan tablet. E usuario kier lesa locual cu e kier, ora cu e kier, unda e kier y cuanto cu e kier. Ta cu e resultado di investigacion di mercado aki den mente, a dicidi cu ta bin cu un corant digital, capas pa cumpli cu e demanda di mayoria den comunidad.
Diferencia di un corant digital
Un corant digital ta trece hopi opcion, cu te dia di awe nos no a conoce. Trempan ta un corant cu video den dje, cu potretnan cu ta move y ta interactivo. Un dimencion completamente nobo den e forma tradicional di informa y presenta noticia na comunidad. E ta casi un television, radio y corant pareu integra den un producto digital y moderno.
Inversion grandi
Pa por a logra yega na e proyecto aki, Headlines Group a haci un inversion cuantioso, no solamente den ekiponan moderno pero tambe engrandece nos ekipo humano di reporteronan y redactornan y diseñadonan profesional pa presenta un producto di calidad halto y rico na informacion pa yuda educa y forma nos comunidad.
Diferencia entre 24ora.com y TREMPAN
E corant lo competi cu e website? Kisas si, kisas no. Un cos si e ta, e corant lo complementa e website. Headlines Group ta boga pa mantene 24ora.com manera cu e ta, esta prome den noticia, cu noticianan transmiti bibo for di e sitio di sucedido y cu un toke poco sensacionalista. E corant digital TREMPAN lo presenta e noticianan di forma diferente y mas completo cu analisis y cu detayenan actualisa di e sucedido. Desde awo 24ora.com lo informa bo prome, pero TREMPAN lo complementa e noticia su mañan.
A percura pa e media nobo aki tin su mesun staff di redactornan pa percura pa nan mesun contenido. Den esey por spera TREMPAN cu noticianan diferente cu locual a sali caba. Por ehempel, tin un cantidad di paginanan di entretenimento, di noticia internacional, di deporte local y internacional, di Corsou, Venezuela, Colombia, Hulanda y sin lubida paginanan special di aspectonan legal, financiero, aviacion y turismo, cu lo bo no topa cu ne riba nos website di noticia.
Pa awo: Abona GRATIS
Desde awe te cu fin di februari, tur usuario tin acceso gratis na e website y e corant tur dia, di dialuna pa diasabra, for di momento cu public’e pa 6:00am. Pa awo mester subi e website www.trempan.com y yena tur informacion pa asina inscribi pa ricibi e corant digital tur mainta. Pa mas facil, click AKI.
Desde luna di maart lo cuminsa cobra sea pa dia, mensual, pa seis luna of pa un aña completo di abonnement. Pero prome cu yega asina leu, permiti nos den e siguiente seis simannan presenta nos calidad di contenido na bo pa asina nos usuarionan mes scoge of no pa abona. Nos ta convenci di lo haci tur nos esfuerso pa demostra un diferencia grandi di locual ta custuma cu ne awo, den mas pagina y pagando menos pa luna, tanto pa abonnement como pa aviso.
Nos kier tende di bo
Claro cu nos ta conta di tende di nos usuarionan di custumber. Nos base ta surpasa 130 mil usuario mensual riba e website di noticia, cu ta haci nos e medio cu mas siguido na Aruba. A custuma di mantene un relacion estrecho cu nos usuarionan, cu nos ta spera di sigui riba e mesun pia cu Trempan. Pues, si tin noticia cu bo kier comparti cu nos, manda un email libremente pa [email protected] y si tin cualkier sugerencia of critica pa nos mehora e calidad of pa por surpasa e nivel di expectativa di bo banda, laga nos sa via [email protected].
Pa awor, permiti mi yama tur mi coleganan DANKI pa e sosten di semper y e trabou duro desplega e ultimo lunanan. Y awor e trabou duro ta cuminsa, cu sosten di nos usuarionan y di comercio, cu semper a sostene nos den tur proyecto di desaroyo y diversificacion di noticia.
Trempan a bin pa keda….cu noticia den bo plant’i man.
Mark-Benson Denz
Director di Headlines Group
