Actualmente ta riba nos isla un grupo di VIP representante for di e region di Latino America pa atende e ‘Latin American Planning Meeting di Aruba’ – LAPMA 2018. Ta trata aki di e top 3 companianan, companianan VIP, di cada mercado den e region di Latino America. E evento, organisa pa Oficina di Turismo (A.T.A.) tin como obhetivo pa fortalece e presencia di nos pais como destino na Latino America. Esaki sigur bao di e top companianan y VIPs den e region.
Como parti di e esfuersonan di mercadeo, A.T.A. a introduci recientemente un concepto di mercadeo nobo cu e slogan di: ‘Necesitas Aruba.’ E campaña ta busca pa mantene y amplia e resultadonan positivo cu a bin ta wak consistentemente (ora exclui Venezuela).
E programa di LAPMA 2018 cu ta cubri di diadomingo 6 pa diaranson 9 di mei y ta diseña di manera cu e participantenan ta reconecta personal- y directamente cu oportunidadnan y posibilidadnan cu producto Aruba ta ofrece na nan y na nan clientenan.
A.T.A. ta wak un potencial di crecemento den e continente Suramericano y, como parti di su plan strategico pa e añanan nos dilanti, ta ehecutando proyectonan cu ta capitalisa riba e mercadonan emergente manera ta Colombia, Argentina y Brasil. Adicionalmente, den LAPMA 2018 tin representantenan tambe di Chile, Peru y tambe aerolineanan cu ta opera den henter e region.
E programa di LAPMA 2018 ta inclui tambe encuentro cu directiva di A.T.A. caminda ta elabora riba e prestacion di Aruba den e mercado den e ultimo temporadanan, mescos cu e vision cu e entidad di maneho y promocion di destino Aruba ta implementando pa mehora e nivel di e producto y experiencia cu ta brinda na nos bishitantenan.
Otro punto resaltante ta e presentacion di experto di turismo na Google, Alejandro Rico; mescos cu bishita na diferente parti di nos isla, danki na e cooperacion di varios compania local di sector turistico. Adicionalmente, a dedica tempo y espacio na atende un workshop di planificacion y sesion ‘Business 2 Business’ for di cual nos negoshinan local por beneficia cerando acuerdonan.
Oficina di Turismo di Aruba ta yama nos invitadonan special di e siman aki un caluroso bonbini y ta invita comunidad en general pa, manera semper, duna nos miho cara. Ta desea cada participante un exitoso y fructifero LAPMA 2018.
