“Ta importante pa nos realisa con importante ta biba den paz, pasobra nos no kier guera mas,” Prome Minister Evelyn Wever-Croes a enfatisa, recordando asina tur esunnan cu a haci un sacrificio grandi durante Segunda Guera Mundial pa awe nos por ta liber.
Riba e fecha di 4 di mei, tur aña den Reino Hulandes ta conmemora esunnan cu a fayece durante guera. Awe, 4 di mei 2021, ta 76 aña cu Segunda Guera Mundial a finalisa. Ta recorda tur militar y ciudadano cu desde inicio di e guera a fayece. Y tambe ta duna honor na tur cu ta den guera of operacionnan pa paz actualmente.
Na e ocasiona di e fecha aki, Prome Minister ta encurasha e comunidad completo pa semper recorda tur e homber y muhenan kendenan a haci sacrificionan grandi pa awe nos por ta liber.
“Nos ta recorda tur esunnan cu a lucha den guera, y e victimanan cu a perde nan bida den guera. No solamente di dos guera mundial, pero den tur guera. Laga nos nunca lubida nan balentia y nan sacrificio pa nos libertad. Y e unico forma pa garantisa paz, ta di siña nos muchanan desde chikito, respet, tolerancia y empatia pa otronan. Esaki ta un responsabilidad di nos tur”.
E ACTIVIDAD DI TUR AÑA
Normalmente riba tur 4 di mei, Gobernador di Aruba, hunto cu Prome Minister y tambe e representantenan di Camarada Aruba ta tene un ceremonia conmemorativo na e monumento riba LG Smith Boulevard, unda cu ta tene dos minuut di silencio pa e victimanan di guera pa medio di e señal taptoe (cual ta e señal di trompet cu ta anuncia e inicio di e dos minuutnan di silencio)..
Durante e momento di silencio a conmemora tur esunnan cu den nomber di Reino Hulandes a perde nan bida of asesina durante e di Dos Guera Mundial. Tambe a conmemora esunnan cu desde e tempo ey a perde nan bida den e conflictonan di guera of den e misionnan pa mantene paz. Riba 5 di mei ta net 75 aña pasa cu e di Dos Guera Mundial a termina pa Hulanda.
Segun tradicion, despues di e di dos minuutnan di silencio, a toca e himno nacional di Hulanda y Aruba. E musica tabata na encargo di Tamboers en Pijpers di Marinierskazerne Savaneta.
MIENTRAS TANTO NA HULANDA
Mescos cu aña pasa, Hulanda ta conmemora e asina yama ‘Dodenherdenking’, na un sistema adapta, debi na e pandemia di COVID-19.
No lo tin audiencia den e conmemoracion aki ni tampoco lo bay tin fiesta riba Bevrijdingsdag, cual lo ta mañan.
Riba e combinacion di potret por mira e conmemoracion di ‘Dodenherdenking’ tanto na Aruba na 2020, como na Amsterdam, caminda cu Rey Willem-Alexander y Reina Maxima ta conmemora esaki na Amsterdam riba e dia di awe.