SETAR NV a presenta e producto GEOTAB na Ministerio di Infrastructura. Esaki ta un sistema di GPS cu tin diferente funcionalidad pa monitor y controla maneho di e vehiculo, cu e intencion pa explora un posibel implementacion den e sector di ATV y UTV rentals na Aruba.
E presentacion aki ta forma parti di e buskeda pa identifica solucionnan tecnologico cu por contribui na un miho control di vehiculonan den areanan protegi y na e cumplimento di reglanan vigente pa proteccion di nos naturalesa.
GEOTAB ta un compania di Canada cu ta ofrece solucionnan tecnologico pa monitor vehiculo y maneho di flota. SETAR NV ta uza e sistema aki caba den su propio operacion cu resultado positivo segun e informacion comparti durante e presentacion.
E proposito ta pa evalua con e tecnologia aki por wordo introduci den companianan cu ta ofrece ATV y UTV rentals y tambe den Parke Nacional, Dienst Natuur en Milieu (DNM) y otro instancianan relevante.
E posibilidad pa bende e sistema na e companianan di rental ta forma parti di e iniciativa pa amplia e uzo di e solucion tecnologico aki na Aruba. Pa medio di diferente funcionalidad, e sistema por ofrece mas visibilidad riba e uzo y e ruta designa door di gobierno pa e vehiculonan, dependiendo di e configuracion y funcionalidad cu wordo implementa.
E informacion aki por yuda e instancianan envolvi pa obtene un miho bista ariba e areanan unda vehiculonan ta core y pa evalua e medida cu por contribui na proteccion di areanan natural y na e aplicacion di reglanan vigente.
E siguiente paso ta pa organisa un demostracion pa e instancianan y sectornan envolvi. Durante e demostracion aki, lo por mira mas detayadamente e posibilidadnan di e sistema y evalua con nan por wordo aplica como un posibel solucion pa e necesidadnan di Aruba.
E iniciativa ta habri espacio pa dialogo y cooperacion entre sector publico y priva, cu e meta pa identifica e posibilidad cu por contribui na un miho monitor di e vehiculonan y pa proteccion di nos patrimonio natural.
Segun Minister Herdé, proteha nos naturalesa ta un responsabilidad comparti y pa logra esaki, ta importante pa sigui explora solucionnan cu ta combina tecnologia, cooperacion y cumplimento di e reglanan vigente.
