Diabierna mainta Gobiernio di Aruba a reuni cu Secretario di Reino Sr. Raymond Knops. Di parti di Gobierno di Aruba tabata presente Minister Presidente Sra. mr. Evelyn Wever-Croes, Minister di Finanzas, Asunto Economico y Cultura Sra. mr. Xiomara Ruiz-Maduro y Minister Plenipotenciario Sr. Guilfred Besaril.
Despues di e reunion e mandatario encarga cu finanzas Ruiz-Maduro a duna un declaracion na prensa na unda el a informa cu durante e reunion a trece dilanti e situacion financiero di Aruba, locual a ser encontra y e trabounan cu Gabinete Wever-Croes a bin ta haciendo y con tin pensa pa bay dilanti.
E reunion a bay den un atmosfera ameno caminda Aruba a indica cu ta desea tempo pa por pensa y por traha riba un plan den cual na un manera structural Aruba por yega na un finanzas publico manehabel.
Gobierno anterior nunca a fiha un plan structural pa yega na un finanzas publico manehabel. Esaki ta bira e diferencia entre e dos gobernacionnan. Gabinete Wever-Croes kier hiba un finanzas publico manehabel y lo no haci cosnan incidental/ad-hoc, sin planeamento.
E minister ta bisa cu Gobierno di Aruba kier cumpli cu palabracionnan pasobra Aruba ta bao un supervision financiero.
Minister Ruiz-Maduro ta bisa cu esaki ta bira e apertura tambe di locual lo bira e negociacionnan cu lo mester tuma lugar mas den aña cu politiek Den Haag pa asina nos stipula con nos lo sigui dilanti sigur pa locual ta e supervision cu awor aki tin.
Tambe den e reunion cu Secretario Knops a informa e manera con Gabinete Wever-Croes lo traha pa asina Aruba por conoce un finanzas publico manehabel y manda un señal na mundo henter cu gobierno y Aruba ta confiabel. Gabinete Wever-Croes lo salbaguardia nos finansas publico pa asina nos yiunan tin bon oportunidad di progreso riba nos pais.
