For di october 2020 te na e momentonan aki cu ta conoci cu e prome vacuna di Pfizer ta aproba y cla pa subi mercado. Ministerio di Salud ta den contacto directo cu Ministerio VWS (Volksgezondheid, Welzijn en Sport). Durante e periodo aki Aruba por medio di un grupo di tayer di exepertonan cu experiencia ariba e terreno di vaccunacion na Aruba ta haci tur preparacion necesario pa Aruba ricibi e vacuna aki.
Na fin di december 2020 a aproba e vacuna di Pfizer na Europa y di e momento ey Hulanda tambe a cuminsa prepara pa nan haya e vacuna y cuminsa e proceso pa duna vacuna na nan ciudadano nan conforme nan maneho. Minister Oduber tin cu bisa cu e ta hopi agradecido na e bon cooperacion y assistencia cu Ministerio di Salud ta hayando for di secretario di estado sr Blokhuis. E secretario di estado y henter su team ta hopi atento cu Aruba y ta percurando pa duna tur asistencia necesario.
E proceso pa ricibi e vacuna no ta uno asina facil. Aruba mester prepara henter un draaiboek pa asina Hulanda por controla esaki pa por ricibi e prome vacunanan. E siman aki ta entrega e draaiboek definitivo na Hulanda, caminda Aruba ta mustra por medio di un plan extenso y detaya cual ta encera entre otro e sigura mantencion di e cold chain, preparacion di tur logistica rond di e vaccuna aki, preparacion di e opslagplaats y maneho y strategia di vaccunacion. Di e forma aki Aruba ta mustra Hulanda di ta cla prepara pa ricibi e vacuna aki lo mas pronto cu ta posibel.
E vacuna lo cuminsa trece trankilidad na Aruba y mundo y ta e prome paso pa por bolbe bek na normalidad. Departamento di Salud Publico ta prepara pa ricibi e vacuna cuminsa cu esaki conforme e maneho. E aña aki ta un aña di recuperacion y e bon noticia ta cu aña ta habri cu varios vacuna riba mercado. Aruba lo haci tur posibel pa vacuna esnan cu ta traha den cuido, esnan cu ta biba den casnan di cuido, nos grandinan y esnan den categoria di risico mas lihe posibel. Gobierno lo keda brinda informacion y lo tin diferente campaña di informacion pa educa y informa pueblo riba e vacunanan.
