Diaranson, Aruba lo bolbe conoce un otro aumento di gasolin. Algun ciudadano preocupa ta di opinion cu hopi hende ta probecha pa bin tank nan auto, probechando un siman cu gasolin ta barata toch.
Pero tambe ta haya ciudadano cu ta di opinion cu no por haci nada cu esaki, en bista cu e situacion ta na nivel mundial y no na Aruba so. pa loke ta e presupuesto familiar, sigur nan lo sintie den nan cartera, pero no por haci nada pa resolve esaki.
No ta prijs di gasolin so ta subi, pero prijs di cuminda tambe. Pocopoco carni ta birando un luho, cu hopi hende lo no por afford pa mucho tempo mas. Tur cos ta subi, menos salario.
Di awo padilanti, lo mester pensa dos pa tres biaha prome cu sali for di cas pa bay keiro rond di nos isla. Auto, cu antes tabata un necesidad, awo ta un luho. Un luho cu hopi hende lo no por afford mas.
Memey di e pueblo ta reina un intrankilidad, mirando e hecho cu prijsnan ta sigui bay halto, pero salarionan ta keda mescos.
Pero loke ta causa mas tristesa entre nos ciudadanonan ta e hecho cu gobierno mes no ta haciendo nada. No ta keda nada otro di ahusta e presupuesto familiar. Si antes por a tank cu 25 florin, awendia esaki no ta posibel mas. Bida ta sigui.
Gobierno a corta tur caminda, no a keda nada mas pa corta. Pueblo ta sufri, mientras cu e gobernantenan mes ta sigui fiesta bay.
Un situacion sigur fastioso pa esunnan cu nan trabou ta riba caya, sea como bendedo, reportero, etc. Esunnan cu mas ta sufri ta esunnan cu ta traha riba caya, nan lo sinti esaki hopi mas den nan cartera na momento di tank nan auto.
