Oriana Wouters hunto cu Nigel Maduro a bay Sint Maarten pa asisti na e Caribbean Climate Justice Camp. Wouters ta conta cu generalmente esaki tin di haber cu networking den Caribe via e network cu e tin via Caribbean Climate Justice Leaders Academy, el a keda invita pa medio di un di e organisadonan pa participa como un representante di isla den Reino Hulandes.
Wouters ta bisa cu di e forma aki el a keda informa y otronan a pidi’e pa participa sea pasobra nan mes no por bay of tambe cu tabata kier pa tin un representante di Aruba. E temanan cu nan lo haya training riba dje ta entre otro Energy Transition, naturalesa,ecologia, con pa core un campaña como activista anto e otro parti ta cultura y gap cu tin den genero y otro desigualdadnan cu tin.
E meta di esaki ta pa siña for di otro lidernan den tema di clima den otro nacionnan den Caribe. “Nos por trece cosnan bek na Aruba si nos siña cosnan nobo eynan y siña for di nos hermana islanan,” segun Nigel Maduro. Esaki ta e mesun hoben conoci tambe p’e protesta NO MAS HOTEL, un hoben activista cu a hala hopi atencion cu su protesta dirigi entre otro pa preserva y proteha nos naturalesa na Aruba mirando tur e crecemento cu tin sigur den turismo ultimo añanan. “Locual tambe nos por haci ta network cu otro islanan den Caribe cu ta pasando den cambio di clima anto otro situacionnan tambe di naturalesa. Nos kier wak con nan ta adapta y maneha tur esakinan tambe,” segun Maduro.
Wouters ta enfatisa cu e meta tambe principal tras tur esaki ta pa yuda activistanan adkiri hermentonan pa sigui avansa den nan comunidad. “Ami como activista mi a por ehempel den pasado pidi gobierno pa participa como Aruba den un documento cu Reino Hulandes lo bay aplica p’e na International Court Of Justice cu e pregunta kico ta e rol di ley internacional den cambio di clima, anto kico t’e obligacion y consecuencia di estado di esaki,” Wouters ta splica.
Kico a pasa, Hulanda a prepara un documento pa manda nan interpretacion di ley internacional den cambio di clima, pero e tabata di manda esaki den nomber di henter Reino Hulandes. Pa medio di sinta cu Hulanda, Wouters a keda conseha pa papia cu gobierno local tambe pa asina nan tambe participa y cuminsa papia cu Hulanda pa esaki bira berdaderamente un documento di Reino.
“Pasobra nos como isla dentro di Reino Hulandes tin e tendencia di ta exclui for di e tema di cambio di clima mundialmente.” Esaki ta bini segun Wouters pasobra nos relacion den Reino ta hopi complica. Hulanda a firma e convenio di Paris y esun di Nacionnan Uni, anto exclui tur nan teritorionan. Den e interpretacion di ley internacional, Wouters ta splica cu nan ta papia di e estado cu a firma cual ta Hulanda, pero door cu a exclui paisnan di Caribe, ta haci Hulanda obliga den reduci gasnan cu ta emiti daño na medio ambiente (Co2), pero e por tin companianan di Shell riba e islanan si lo tabata desea por ehempel pasobra e islanan no a firma. E ora ey e ta un contradiccion den nos relacion cu otro y esaki ta cosnan pa percura di no exclui Aruba. “Pasobra Aruba ta afecta, y nos tin cu ta enfocando riba adaptacion tambe pa e cambionan andando aworaki den clima.”
