Awe nochi e fanaticonan di RCA y Dakota lo yena e Compleho Deportivo Frans Figaroa pa e gran final di Liga Oro. Gilmar Croes, president di SV Dakota, a invita tur e fanaticonan di futbol pa e gran final di Aruba su futbol. Esaki ta un final cu tur hende tabata spera. Dakota ta denun ambiente completo na e Centro di Bario y Deporte Dakota pa e benta di ticket pa e wega di awe nochi.
Dakota ta cla!
Si ainda bo no tin ticket bo por yega e centro di bario y garantisa bo entrada pa e tremendo wega aki. Apart di ticket por cumpra tambe e materialnan di apoyo pa e team di Dakota. Tin sjaal, jersey y sticker na Centro di Bario Dakota. E ticket tin un balor di 10 florin pa adulto y 3 florin pa mucha. Wega ta cuminsa 8:00 pm y 7:00 pm porta ta habri.
Tocante SV Dakota
SV Dakota ta existi desde aña 1947 caba y durante e su trayectorio a sa di logra conkista e titulo di campeon di futbol division di honor na mas di un ocasion den pasado. Sinembargo, e ultimo biaha cu el a bay cas cu e trofeo tabata na 1995.E organisacion ta conta cu futbolistanan di tur edad, cuminsando cu Mini baby, Baby, Lifida A, Lifida B, Menor, Mayor, Junioren, Damas y Division Honor. Na tur ta papia di mas o menos 175 hungado den total. Den e seccion di Division Honor, ta conta cu un ekipo cu 25 hungado, 4 staff tecnico y 4 miembro di directiva. Coach ta Jonathan Lake cu ta conta cu un amplio experiencia den futbol local.
RCA cla p’e final
Jeff Lopez, presidente di RCA, a cuminsa bisando cu awe nochi ta bay tin un espectaculo. Ta spera cu ta bay ta un tremendo wega. E club ta bon prepara y e hungadonan ta bon enfoca. Henter a aña nan a prepara. RCA ta conta cu varios hungado nobo y hoben cu lo hunga final pa
prome biaha. Lopez a indica cu por a nota cu durante e transcurso di aña e a cay den otro, pues nan a uni mas. Awe nochi lo mira kico lo pasa na momento cu e bala cuminsa lora. E hungadonan ta mentalmente prepara. Diabierna anochi a papia cu e hungadonan y mustranan
diferente video.
RCA na Dakota: Papia menos haci mas!
Awe ta bira e ultimo wega di e legendario Ronald Gomes y cu esaki den mente e hungadonan ta cla pa duna Gomes un tremendo despedida. “Nos no ta papia riba veld so nos ta haci tur cos”, Jeff Lopez a comenta. Ademas el a menciona cu Dakota por tin speranso pero RCA ta miho prepara. E ta bay ta un bon wega pa tur cu ta gusta futbol.
Ta importante pa e wega keda uno amical y laga e rivalidad riba veld so y no pafo. Pa e fanaticonan di RCA tin un t-shirt nobo y ainda tin den stock na club. Nan t’ey te cu 2:00 pm pa tur cu kier busca t-shirt y ticket. Si RCA gana e lo ta e 34 titulo y otro aña ta e di 35, pues ya caba nan tin e trofeo di otro aña den mente. “Dakota hopi exito pero lamentablemente na final nos ta bin cu e titulo cas si”, asina e presidente di RCA a comenta.
Tocante SV Racing Club Aruba
A funda SV Racing Club Aruba (RCA) dia 15 di februari 1934. E team a sa di crece den e ultimo 85 añanan te bira un organisacion di riba 300 futbolista. Nan ta parti den division di infantil, hubenil, hoofdklas, damas, 35+, 40+ y 50+. Roland “Ditto” Acosta ta Presidente di e
organisacion, mientras cu Juan Valdez ta e coach di e ekipo di 25 futbolista cu ta hunga den e division di Honor.
Historia a conta nos cu den pasado, e ekipo di RCA a logra titula campeon na 34 ocasion. E ekipo di RCA ta e prome campeon di pais Aruba na aña 1986 y ta e prome team di Aruba pa bira campeon Antiano na aña 1966. E ultimo biaha cu SV RCA a bay cas cu e trofeo di campeon tabata den e campeonato di aña 2015-2016, e tempo ey contra SV Dakota.
Tocante AVB
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.
