Si bo yiu ta gusta musica y tambe toca instrumentonan di ritmo, aki ta bo oportunidad.
Carlos Bislip ta presenta e proximo proyecto pa e aña aki, e Drum Set & Percussion Camp 2023. El a comenta cu na aña 2009 ela organisa e prome Drum Camp cu dos obhetivo.
E prome tabata pa introduci na e comunidad y e hobennan di Aruba cu e mundo di percussion ta hopi amplio anto cu ta encera varios instrumento ademas di drum set, conga y timbal. E di dos obhetivo tabata pa demostra cu ora tuma instruccion di musica di un manera intensivo, esta 3 ora pa dia 5 pa siman pa 4 siman e participantenan lo siña masha hopi mes.
Carlos Bislip a comparti cu nos cu ademas di a logra e dos metanan aki, tabata tin varios otro factor cu a bin na superficie cu ta di balor agrega na e crecemento di e participantenan. El a ripara cu e muchanan a siña “Problem Solving Skills”, e abilidad di resolve problema, colaboracion – esta traha hunto cu otro y tambe con e muchanan cu tabata capta e informacion musical mas lihe cu e otro muchanan, a cuminsa demostra cualidadnan manera “Peer Mentoring” – esta guia otro den e proceso di siñamento.
Carlos Bislip a menciona cu e ta wak e Drum Camp manera un opportunidad pa e siña e participantenan un poco mas di e mundo amplio di percussion unda nan ta siña e fundamentonan di entre otro Drum Set, Percussion Latina (Congas, Timbal, Guiro, Guira, Wiri) Snare Drum y ‘Multi Pitch Reading’. Pero tambe e ta wak e Drum Camp como un manera pa recruit of discubri posibel talentonan nobo.
Nos a puntra Carlos Bislip di ki otro manera e Drum Camp a contribui na e panorama musical di Aruba. “Wel, ora ta trata di un forma di arte e desaroyo ta tuma su tempo pa asina ta efectivo den un comunidad of sociedad. Prome ta e introduccion di e Arte den forma di les, despues ta logra e nivel y e dominio di Arte, anto finalmente e aplicacion di esaki den e cultura of e folklore di e comunidad”.
Carlos Bislip a comenta cu atravez di e añas varios di e participante di e diferente edicion di e “Drum Camps” a sigui desaroya nan mes anto sobresali den e mundo musica aki na Aruba. Tambe algun di nan a tuma e decision pa studia musica den exterior como percusionista. Por ehempel Lidrick Solognier, Siegfried Hart, Chris Rodulfo y Stephen Diaz. E aña aki Alejandro Gonzalez Denzil Tromp tambe ta bay studia den exterior.
Banda di esaki, Carlos a comenta cu atravez di e añanan el a ripara cu su alumnonan cu ta sobresali a forma un nuclio di percusionista cu ta wordo utiliza door artistanan y gruponan cu sa participa den festivalnan local.
Nan ta wordo puntra pa toca como nuclio door cu nan conoce e ritmonan y tambe door cu nan por lesa musica anto cu esaki ta haci e ensayonan ta cana mas facil cu ta refleha nan profesionalismo.
Pa cu e aña aki e informacion di e “Carlos Bislip Drum Set & Percussion” ta lo siguiente:
Duracion: 4 siman – Dialuna pa Diabierna (20 dia total). Fechanan lo ta di 10 di juli pa 4 di augustus for di 8:30 AM pa 11:30 AM. Edad lo ta entre 16 pa 20 aña y costa ta Afls. 250.00 pa persona. E curso ta tuma luga na Vondellaan #2 na Oranjestad, Aruba. Den e espacio di Edu Campus na Cas di Cultura.
Pa registracion por fabor manda un whatsapp na +297-592-6449 (Carlos Bislip). No perde e oportunidad aki pa bo yiu por siña e fundamentonan di musica y percusion tambe desaroya otro habilidad cu lo por yud’e pa e resto di su bida!
E edicion aki di e Carlos Bislip Drumset and Percussion Camp ta conta cu e sosten di entre otro: Innovative Business, Fundashon Donny Lacle, Bryan Auto Parts, Botica San Nicolaas, UNOCA, DCA, SETAR, CEDE Aruba, Cliffix Musical, VNO, Scol di Musica Rufo Wever, EduCampus Aruba, Vibration PR, George Cycles, Aruba Ocean Villas y Walking Turtle Entertainment.
