Contrario na e declaracionnan di Minister Presidente mr. Evelyn Wever-Croes, fuentenan den e departamentonan concerni ta sigura cu Aruba no tin 12 mil Venezolano ilegal scondi riba nos isla. Casi esey kiermen cu mita di e casnan na Aruba tin un Venezolano ilegal scondi den dje. Unda e mandatario a yega na e cifra no ta conoci, pero sigur no di canalnan oficial.
Tabata na inicio di fin di siman, na momento cu Presidente Nicolas Maduro a anuncia di ta cera fronteranan cu Aruba, Boneiro y Corsou, cu Minister Presidente Wever a duna un entrevista na television Hulandes, den cual el a indica cu na Aruba e ta kere cu tin 12 mil Venezolano scondi ilegal of buscando asilo politico. El a bisa cu e problema ta serio y si bin un cantidad di Venezolano pareu, cu lo purba manda nan Boneiro pa eynan brinda nan alohamiento.
“Ami no sa di unda MinPres a yega na e cifranan aki”, asina mas di un fuente for di e area di stranheria a duna di conoce. Tur ta corda cu un tempo a estima cu e cantidad ey lo por a yega 2 mil pero nunca 12 mil!
Es mas, ta sinti cu e prome mandatario no ta compronde tampoco con e sistema ta funciona pasobra hopi di e “turistanan” aki ta pidi prolongacion di nan estadia turistico, otronan tin propiedad riba nos isla cu ta duna nan cierto derechonan y otronan a cuminsa e proceso di pidi permiso caba. Ta cuestion di verifica den Radex (sistema di computer na Inmigracion) cuanto pasahero a drenta y cuanto a sali y di eynan evalua e restante.
No ta sintando cu e departamentonan
Pa por ta miho informa di e reto aki di un posibel invasion di Venezolanonan buscando asilo of refugio social na Aruba, ta rekeri pa e mandatario topa semanalmente cu e departamentonan den e “Vreemdelingenketen” of participa den e reunion “skype conference” bimensual na nivel di tur pais den Reino Hulandes.
A opta pa persigui algun di e ehecutivonan den e departamentonan aki, a move algun hefe di nan funcion, a avisa algun otro di e mesun tipo di ideanan pa futuro, pero no a cuminsa maneha e retonan mes ainda. Esaki ta pone cu despues di dos luna di gobernacion, ainda Prome Minister Wever no ta consciente di e reto mas grandi pa Aruba den e ultimo lunanan: Venezuela.
