“Tin puntonan den e condicionnan cu nos ta di acuerdo cu nan y tin puntonan cu nos no ta di acuerdo”, asina Gina Maduro, Presidente di sindicato ABV, cu ta representa trahadonan den cuido na Hospital, na IMSan, na Respaldo y na casnan di nos grandinan, a vocifera awe despues di a atende e cumbre cu gremionan comercial y sindical. Gobierno di Aruba a repasa kico ta locual ta e condicionnan, cua ta facil pa cumpli cu nan y cua riba e lista lo tin dificultad of consecuencianan cu nos no pos atende.
Pa Gina Maduro, na Aruba nos cuido medico medico ta bastante avansa y nos a inverti hopi den e ultimo añanan aki. Lo ta masha lamentabel pa tur nos inversionnan bay perdi, si por ehempel lo beneficia Corsou of otro paisnan den Reino riba nos. Por ehempel, na IMSan a inverti y desaroya un centro grandi den radioterapia y tratamento specialisa di wowo, mientras cu na Hospital a desaroya un cat-lab pa haci caterisacion di curason na Aruba mes.
“Ami lo kier wak con e parti regional lo bay ta, si ta Corsou ta bay haya tur e partinan ey siendo cu nos a inverti caba y nos ta hopi adelanta den hopi punto. Mi no ta descualifica Corsou pero Aruba ta hopi desaroya den algun cos caba”, asina Gina Maduro a enfatisa. Di otro banda, e ta contento si cu Hulanda lo kier amplia capacidad di ICU, expande capacidad pa haci test, cumpra ekipo extra pa trahadonan cu Covid-19, y asina por sigui menciona. “Tur esakinan ta e parti bon”, el a bisa.
Pero pa e sindicato di enfermeronan, ta importante pa den e reparticion di trabou y trahamento hunto den region, pa Aruba no sali di malo of perde e tratamentonan cu nos tin caba y cu tanto nos a inverti den dje caba den e ultimo añanan aki.