Tabata diasabra atardi laat pa 6:34 pm ora cu diripiente henter e sistema di produccion di coriente di Aruba a bay plat. Esaki net despues cu algun bario tabata sin coriente caba pa motibo di un fayo cu a presenta den boilernan na WEB. Sinembargo no a logra contene e fayo y a ocasiona cu a benta henter e planta abou cu consecuencia cu nos isla a bay den un blackout di mas of menos 10 ora largo!
Luis Oduber, director di WEB Aruba NV, a start su conferencia ta pidi disculpa pa e inconveniencia cu e fayo aki a causa na henter comunidad. E ta consciente cu e fayo tabatin efecto negativo den comunidad, tanto pa nan clientenan domestico, como tambe esunnan comercial. Di otro banda el a sigura cu e empleadonan di WEB Aruba NV y tambe esunnan di NV Elmar a traha incansablemente pa por a logra lanta e planta bek y distribui coriente na tur e barionan.
Tur cos ta mustra, cu e fayo a cuminsa den un chip, un procesado den un di e computernan na WEB. Ta un carchi chikito asina a causa cu e fayo a benta un boiler abou, cu consecuencia cu e demanda a bira mas cu e produccion y consecuentemente benta otro boilernan tambe abou y na final henter e planta a bay plat. Pa mas informacion, lesa e edicion di TREMPAN mañan.
