E aña aki e federacion international di landamento (FINA – Fédération Internationale De Natation) a cambia e nomber di e deporte “Synchronized Swimming” pa “Artistic Swimming”. E cambio aki tin como meta pa e publico en general por compronde cu e landadornan mester ta synchronisa cu e musica ora di e rutina. Si bo persona a yega di presencia un rutina (show) di landamento artistico, por admira e detayes nan di cada rutina cual ta ensera oranan di entrenamento pa perfecciona cada moveshon. Pa por realmente competi internacionalmente atletanan mester prepara por lo menos 9 – 12 luna adelanta. Barracudas Aruba ta inicia e temporada di preparacion pa 2018 den full swing cu varios evento. Cuminsando cu e competencia di ASU den September, sigui pa e competencia di figuranan completamente nobo cu a tuma lugar den november. Atletanan di categoria 12&U a demostra figuranan: Kip, Swordfish, Swan y Water Drop. Mientras cu atletanan di 13-15 a demostra figuranan: Albatross 1⁄2 Twist, Swordtail, Porpoise Continuous y Seagul.
E top 3 atletanan pa e categoria di 12&U:
1. Mikayla Morales 55.4178
2. Ambar Silva 52.8728
3. Sofia Cardona 52.7372
E top 3 atletanan pa e categoria di 13-15:
1. Sarah Silva 62.3840
2. Avigayle Tromp 58.2241
3. Ariana Dijkhuizen 57.7137
Un pabien ta bai na tur atleta cu e resultadonan. E trabou incansabel di e coaching staff
y dedicashon di e atletanan mes ta di elogia, pasobra ta ripara claramente cu e
atletanan ta mehorando.
Den liña cu e metanan di e organisashon, Barracudas Aruba recientemente a organisa
un Trainings Camp cu Lori Eaton, un coach internacional, head coach na Lindenwood
University. Bou su liderazgo, e ekipo Lady Lions di Lindenwood University a positiona
den e mihornan na Estados Unidos. E camp a inicia dia 26 di november y a culmina
diasabra ultimo.
“Nos ta trahando duro hunto cu nos coaches local y international pa stimula y sigui
desaroya e atletanan. E meta semper ta pa tene Aruba su nomber halto
internationalmente.” Sra. Memita Gomez president di e club ta comparti.
Nos siguiente actividad lo ta diasabra 9 di december @9:00am, unda lo tuma luga e
competencia Mini Arubaanse Kampioenschappen y tur atleta di Barracudas lo participa
den categorianan Beginners, 10 and under, 11-12, 13-15 y Juniors. Ta cuminsa cu e
figuranan di Beginners, sigui pa e rutina nan y despues lo tin entregamento di medaya.
Barracudas Aruba ta invita e pueblo di Aruba pa bin admira y presencia e evento aki.
Ken nos ta?
Barracudas Aruba desde 1974 a introduci e comunidad di Aruba na e bunita deporte di
landamento sincronisa (artistico) cu e meta principal pa brinda atletanan
oportunidadnan pa desaroya y prepara nan mes den e deporte pa competencianan
international. Den 2017 a introduci e opcion pa hasi landamento artistico pa recreacion,
dunando shownan local un biaha pa aña. Tambe a habri e deporte pa mucha homber
por participa mirando e desaroyo den e deporte internationalmente. Pa mas informacion
por bishita nos riba Facebook @barracudas.aruba, Instagram Synchro Aruba of
Website: www.barracudasaruba.com
