Den un declaracion duna, Parlamentario mr. Drs. Arthur Dowers a reacciona riba e ponencia cu Minister Otmar Oduber a trece dilanti diamars ultimo den un reunión di Parlamento riba e proyecto di Green Corridor.
Dowers tabata hopi fuerte, criticando e Minister fracasa cu a yama un reunion. El a bini Parlamento diamars cu un plan diabolico pa desacredita e proyecto den su totalidad y pa crea un esfera negativo den Parlamento. Y pa mira si e por haya mas placa pa su presupuesto y sigui hunga wega, changando resto di Gobierno. E scorpion, Dowers a bisa, a wordo changa, pasobra el a bin pidi cierto autoridad pa e por actua como Minister, pero a Sali for di Parlamento cu un mocion cu ta bis’e cu e no tin autoridad pa actua. E por inicia negociacion y despues bin bek Parlamento pa por haya aprobacion di kico mester haci despues. Nan a corta su alanan.
E idea cu cual Oduber a bay Staten, segun e parlamentario di AVP, ta pa caba cu e proyecto di Green Corridor cual tabata un proyecto di e Gobierno anterior, un proyecto di dje mes pasobra e tabata parti di Gobierno pa 7 añanan. El a aproba tur e proceso di e proyecto, tur e leynan cu ta regarda e proyecto. Simplemente pasobra e no a haya su gusto, pasobra pueblo a castigue kitando mayoria su votonan, e tin un rabia enorme contra AVP y e pueblo pa cual el a purba kibra e proyecto aki den e reunion di Staten. “El a trata di crea e impresion cu e proyecto aki tin 500 punto pa cual e lo mester wordo descualifica. Pero despues e mes a admiti den Parlamento cu e proyecto aki ta pa 99% cla y cu e show cu el a haci ta innecesario, pasobra e negociacionnan cu mester tuma luga no tin ningun consecuencia financiero pa Aruba.”
Dowers ta bisa cu berdad tin algun discusion riba aspectonan chikito di e proyecto, detayenan chikito, di cual tin un lista largo di aspectonan manera un tape pega un caminda, algun furstro, palo di luz cu no ta bon, sushi tira un caminda, etc. Hasta e ta bisa cu e no tin ningun confiansa den e brug y cu e brug ta na punto di cay aden pa cual e kier cera e brug; sinembargo el a haya conseho di DOW cu e brug ta bon. “E ta parce un Minister cu a perde cu strea di Nort. Si abo como Minister tin informacion obhetivo cu e brug no ta bon, bo tin obligacion pa cer’e. Bo no por bin bisa “bo ta kere” pero bo ta obliga pa hacie. Si bo no tin ningun indicacion cu e brug no ta bon, bo no por cana papia e coy spectakelnan aki den Parlamento. “
Despues di lesa e rapport cu el a laga Price Waterhouse traha, Dowers a yega na e conclusion cu loke ta e problema ta cu henter e proceso aki mester a wordo monitorea, y registra e proceso di calidad, y e no a tuma luga. E ta lamenta cu awor e ta bin reclama. Esaki e ora ta e disputa entre Gobierno y e compania constructor cu mester a registra e calidad di e trabou haci. Den e caso aki, el a splica, ta Gobierno su derecho e ora di nenga di paga pasobra e compania di construccion mester a cumpli cu e rekisitonan stipula. Esaki ta un discusion entre esnan cu a financia e proyecto y e compania di construccion, y Gobierno simplemente mester keda sin paga. Pero no t’asina cu tin duda den e calidad di e brug. Si e asfalt no ta bon, esey no ta riesgo grandi pa ningun hende y e compania ta keda 18 aña largo responsabel y nan por cambia e asfalt. Pa spanta hende, a purba desacredita e proyecto, pa despues bin bisa cu ta su persona a salba e proyecto cu e Gobierno anterior a laga mal traha. “Como Minister bo mester tin respet pa procesonan cu tin den un pais democratico. SI ta na Hulanda, e lo a wordo pidi pa entrega su retiro, pasobra el purba crea duda den un proceso sumamente importante, un parti di infrastructura di un pais, dunando hende miedo. Si bo tin informacion cu e ta malo, cer’e, de lo contrario cera bo boca.”
